各有千秋 ~ 手作餃子店

呢間手作餃子店晌極具人氣嘅餃子店附近,聽講呢個舖位前身正正屬於嗰間嘅,呢日就嚟食下睇下有乜分別.

店舖面積唔大,食客坐得密密麻麻,走廊迫到只有一個身位用嚟出入之用.雖然嚟呢類型食店心裡都早有預算環境唔會太好,但呢度又的確稍欠舒適.


餃子有十多款口味,可以揀湯餃或煎餃,比較多元化一啲,定價亦算大眾化.


店舖面積雖小.但仍闢咗一角做工作台,店員姐姐就企晌呢度密密包餃子.


我哋叫咗湯餃,揀咗鮮肉白菜餃同鮮肉雲耳椰菜餃配香甜蘿蔔.湯底係花膠淮山豬骨湯,色澤奶白,入面仲有湯料如淮山,胡蘿蔔,薏米,黃豆,豬肉等,份量唔少,有睇頭又夠足料. 先飲一啖湯,淮山味突出,鹹味夠但冇太重口渴感,湯料仲煮到軟腍,感覺唔錯,另外嘅白蘿蔔都幾香甜入味.


佢哋嘅餃子皮唔薄唔厚,豬絞肉同切碎嘅蔬菜比例參半,餡料調味同嗰間相差唔遠,但就好似細隻啲啲,包餃子嘅方式亦略有不同,摺痕比較粗糙,某幾隻仲有漏餡嘅情況.


鮮肉白菜餃食起嚟爽口,味道唔錯.


鮮肉雲耳椰菜餃嘅雲耳同椰菜煮得軟身,咀嚼起嚟冇乜口感,比較失色.


凍豆漿豆味唔算濃,不過淡淡哋甜甜哋都幾解渴.

整體嚟講我幾鍾意呢度嘅花膠淮山豬骨湯,餃子就偏好嗰間嘅出品,總算各有千秋.