紫薯手抓餅 ~ 艾蜜思

想食呢間艾蜜思嘅紫薯手抓餅好耐喇.


等咗一陣,即製手抓餅就完成.

芝士帶子裙邊肉鬆紫薯手抓餅,就咁食手抓餅皮嘅話紫薯味好突出,質感都幾酥脆,同餡料一齊食就被蓋過.中間餡料份量唔少,帶子裙邊爽口彈牙,肉鬆就略鹹,仲有芝士同沙律醬調味,唔會有太油膩嘅感覺,味道偏向濃味,不過都唔錯.

太安樓車仔麵 ~ 林記

久唔久行過,都見呢間林記車仔麵幾多人食.


叫咗魚蛋豬皮蘿蔔豬大腸油麵配咖哩汁,魚蛋唔係一口麵粉嗰種,豬皮幾爽脆,蘿蔔清甜冇渣,豬大腸就軟腍,湯入面嘅咖哩汁辣中帶牛腩汁甜香,飲完都冇乜口渴感.

快捷健康 ~ Subway

有啲趕時間,就揀咗比較快捷同健康嘅Subway.

叫咗兩個廿幾蚊連罐裝飲品嘅套餐.

程序都係咁樣,先揀口味,再揀麵包,最後就揀要乜蔬菜同醬汁.

然後就自己去拎飲品同俾錢.

我叫咗火腿套餐,朋友就係芝士蛋堡套餐,我哋都係第一次飲7-up free,甜度偏低,比平日嘅7-up更似檸檬汽水.


店員加入餡料後,會將麵包拎去稍稍烘暖一下,所以最後拎上手嘅潛艇堡係略為扁平,唔太靚嘅,尤其係芝士蛋仲更加不堪入目,完全係以內涵取勝.

我呢份係火腿切片,麵包就係意式芝士包,蔬菜就揀咗番茄,青瓜,酸瓜,墨西哥辣椒,醬汁係洋蔥醬同蛋黃醬,食落爽口,酸中帶辣,醬汁稀稠度剛好,惹味得來又比一般嘅快餐食物健康.

確如店名 ~ 幾好粉麵茶餐廳

原本想食愛群確如店名炸髀,不過又俾我哋發現呢間幾好粉麵茶餐廳,門面睇落應該係八九十年代嘅產物.


一個舖位係茶餐廳,另一個就係麵包店,呢種模式嘅食肆晌未徹底重建嘅舊式公共屋邨都幾常見.


入面啲裝修陳設就幾新淨.


唔知係唔係曾經翻新過?


餐牌上有唔少插畫,都幾得意,但定價以公共屋邨嚟講唔算平,感覺唔太大眾化.


檯號唔係用數字編排,而係由英文字母A開始嘅人名,冇留意係唔係由A到Z,不過佢哋啲檯的確唔少,我哋呢檯係Christy,真係好得意.


朋友叫咗叉燒燒鵝飯,佢話叉燒係半肥瘦嘅,燒鵝亦皮脆肉香.


我就係下午茶嘅法式西多士,以一整片厚身白方麵包蘸蛋漿炸成.


中間冇其他餡料,不過油份適中,牛油夠香,未知係唔係因為自設麵包店嘅關係,貨源較新鮮,好似比平日茶餐廳食到嘅軟熟,配上糖漿感覺唔錯.


餐飲方面朋友揀咗凍檸茶,佢話紅茶茶味幾甘香濃郁.我就叫咗晌茶餐廳比較少見嘅薑汁紅棗薏米水,跟下午茶餐都唔洗額外加錢.

薑汁味恰好唔辛辣,入面有兩大粒完整嘅紅棗,我將佢哋搗爛再拌勻,飲落就更香甜,薏米嘅份量非常多,煮得腍中帶嚼勁,飲完後既暖胃又美顏,好養生嘅感覺.

雖然定價唔算大眾化,不過食物質素確如店名咁"幾好".

西貢糖水 ~ 滿記

夜晚去咗西貢嗰頭.

咁就去滿記食糖水,雖然係連鎖店度度都有,不過呢間都叫做係佢哋嘅發跡店.

抹茶彩虹,抹茶係指中間嗰球抹茶雪糕,旁邊有啲鮮雜果例如係西瓜,哈密瓜等等,另有星形椰果點綴,朋友話好甜.

楊枝甘露,柚肉同西米份量幾多,西米食落煙煙韌韌,鮮芒果肉就甜而唔酸,冇驚喜但隱陣.

唔一樣 ~ 富記

之前已經食過,今次係熟食亭翻新後嘅第一次,原來附近啲食肆已經唔見晒,三間熟食亭中有兩間都俾富記租咗.



離遠已經見到門口樹立咗兩隻巨型吹氣熊公仔,有啲渣打馬拉松嘅感覺,嘿. 雖然擴充營業啲位比從前多咗,不過嚟到嘅時候已經滿座,好彩等咗大約十幾分鐘左右就可以入去坐.
呢度翻新後只有室內座,加上增設咗冷氣,令樓底變得非常非常非常矮,當晚食客又非常非常非常多,都幾困聲嘈吵.坐位編排得非常非常非常擠迫,不過某部份有半身木欄相隔,總算係同隔離有啲距離感.另外以前係手寫單,而家就變成由侍應即時入電腦,最後就用機印發票到收銀處俾錢,應該會比從前減少咗啲出錯或漏單機會.


我哋叫咗青島啤酒同支裝汽水邊飲邊等食.


酥炸大腸脆身爽口,肥膏較多,不過都可接受,仲有菠蘿同甜酸汁中和膩感.


避風塘茄子表層炸漿酥脆,冇多餘油份,內裡仍然juicy,只係炸蒜唔夠多,不過有啲紅洋蔥,青蔥,大辣椒,食落都幾惹味.

金銀蛋莧菜嘅皮蛋同鹹蛋份量唔少,仲有炸蒜提味,整體唔會太濃,相對起來就健康啲啲.

我哋去嗰日係假期,食客非常非常非常多,侍應就只有幾個,好似有啲人手不足,後加嘅食物要提醒多次先有,不過最初落嘅單就冇出現漏單情況.食物方面冇太大分別,環境就明顯光猛衛生咗,同埋有咗完善嘅冷氣設備,可惜太困聲同非常擠迫,仲失去咗半露天嘅大牌檔特色,而家就只係一間食小菜嘅茶餐廳咁。

冇得揀之下嘅選擇 ~ 友天地

同朋友去附近,先食少少嘢,晌冇乜餐廳得揀嘅情況下揀咗友天地,朋友叫咗份早餐有沙嗲牛肉湯公仔麵,煙肉煎蛋牛油豬仔包同凍檸茶.


我就叫咗番茄薯仔餐肉湯扭紋粉,炒蛋牛油豬仔包,熱奶茶,扭紋粉冇煮得太腍,湯嘅酸味唔濃郁偏向清淡,雖然冇餐牌內列出嘅薯仔,不過都有唔少蔬菜例如係番茄,胡蘿蔔,洋蔥等等,餐肉就係正常味道.


炒蛋口感頗滑溜,牛油豬仔包外脆內稍硬.


不過以三十幾蚊一份早餐嚟講都叫做唔錯喇!

綠茶鬆餅 ~ KFC

有聞KFC新出咗綠茶鬆餅,咁就去食個下午茶.


叫咗個下午茶餐,有綠茶鬆餅,芝心火腿脆卷,熱奶茶,另外用積分換咗盒巴辣雞粒.
綠茶鬆餅嘅綠茶味唔太突出,味道反而被面層嘅蜜糖蓋過,不過拎上手時仍然係暖嘅,食落有牛油香,外層鬆脆內帶點濕潤感.


芝心火腿脆卷外層炸皮較油膩,食咗兩啖先見到中間夾著芝士同火腿,唔會太鹹都幾惹味.巴辣雞粒就似乎已預先整好同存放咗一段時間,炸漿稍腍,不過未算太乾身.