港式小屋 ~ 玥滿屋

上網見到有人話玥滿屋唔錯,呢日就去食下.



佢哋嘅裝修好簡單,面積唔大,只有四張各只可容納二人嘅小圓檯.不過檯面係仿英文報紙圖案,都幾特別.



同埋都睇得出經用心佈置,同一般嘅港式食店略有不同.



呢日嚟到仲啱啱好有下午茶,定價係廿多至四十多元左右,都唔算平.最後我哋叫咗兩份餐,再加一份散叫嘅一口紫薯西多.



朋友原本想食番茄湯,但湯底啱啱好賣晒仲煮緊,於是就叫咗焗葡汁雞皇螺絲粉,雞件煎香咗,當中仲有馬鈴薯同洋蔥,螺絲粉煮得軟身,但又唔會過腍,葡汁都算惹味,份量適中,啲汁夠撈勻成碗嚟食.



鹽脆生炸雞髀配碎蛋沙律,雞髀外皮薄脆,雞肉仍有肉汁,冇炸得太乾身,不過調味唔濃,對我嚟講可接受,對愛濃味人士嚟講可能覺得稍淡.碎蛋沙律入面嘅碎蛋切得較細,口感軟綿.



一口紫薯西多,切成六小件再炸,兩三啖一件,食得都幾方便.



外層香脆,內層紫薯蓉餡唔少,同埋可以見到少少纖維.味道方面甜度唔高,鍾意甜嘅話可以蘸埋糖漿嚟食.



兩份餐跟嘅熱檸茶同熱奶茶,熱奶茶茶香同奶香唔重,不過佢哋唔係茶餐廳,都算無可厚非.

佢哋嘅用餐區同半開放式廚房連水吧一眼睇晒,店員烹調油炸食物嗰陣嘅油煙味都少.定價唔算大眾化,不過小本經營,加上店員態度誠懇友善,都算唔錯嘅.

港式西餐但唔頹 ~ 星廚

聽聞星廚都有一段日子,上次去開食餃子嗰陣無意中發現原來就晌附近,趁呢日就去試試.


佢係間西餐廳,裝修就比較港式風味.


聖誕同新年啱啱過冇幾耐,所以餐廳入面仲有唔少相關嘅節日裝飾.


午餐餐牌係手寫嘅,字體非常秀麗.


參詳過後都係對主餐牌嘅主菜更感興趣,另外仲叫咗兩份小食一齊試試.


芝士焗蟹蓋個蟹蓋入面釀咗一絲絲蟹肉,同埋混合咗啲洋蔥粒同煙肉粒,上面鋪咗層芝士,再焗香而成,唔會焗得太乾太濕,口感爽脆,都幾juicy甜香.伴碟嘅雜菜用咗黑醋調味,都幾清新.


一口牛脷拎到嚟嗰陣已經稍涼,厚切嘅牛脷肉香軟熟而嫩滑,唔濃但夠惹味,感覺都唔錯.


是日餐湯係南瓜湯,湯入面有少少南瓜蓉,每口都係淡淡甜香,蒜蓉多士亦算脆口.


主菜方面起初想試安格斯西冷扒或穀飼法式豬扒,最後都係試咗香煎加拿大比目魚,煎得魚皮焦脆,魚肉唔鬆散,食起嚟軟綿,烹調時用咗鹽嚟調味,鹹度濃郁.用嚟蘸嚟食嘅醬汁酸酸甜甜,魚身底下仲有炒雞髀菇,香菇,炸薯角,雜菜等等,食多啲蔬菜可以中和肉類嘅膩感.


餐飲我就叫咗熱檸茶,檸檬清香又可以消滯.

雖然餐廳嘅陳設同風格係走港式西餐廳路線,但食物嘅質素算唔錯亦唔頹.下次再嚟嘅話會試試呢度馳名嘅烤焗鹹豬手,聽聞性價比好似幾高.

聖誕蛋糕 ~ 美心

買蛋糕嚟慶祝聖誕節,睇咗美心嘅蛋糕櫃,覺得愛心聖誕熊嘅實物好可愛,但一個約兩磅幾,我哋少人食就好似太多.


晌眾多聖誕特別款式之中對聖誕魔鬼雪芳同雜莓芝士蛋糕最有興趣,前者造型似乎比較有特色,不過最後都係以口味為先,買咗後者.


雜莓芝士蛋糕嘅頂層鋪咗鮮士多啤梨,藍莓同忌廉,再用朱古力牌襯托,仲有小小嘅花環增添聖誕氣氛.


芝士蛋糕係質感扎實嗰種,開切後發現最下層餅乾底上搽咗士多啤梨醬,同埋用咗薄薄一層海綿蛋糕分隔,食起嚟都幾有口感,當中微微嘅酸香亦令佢冇咁膩.

好多公雞 ~ ChirChir

去咗尖沙咀嘅ChirChir,餐廳入面有唔少同雞有關嘅裝飾.


最得意係晌唔同角落發現雞蛋嘅蹤影,其實係塑膠嚟嘅,不過都好有趣.


餐牌封面用咗仿皮,上面嘅Q版公雞圖案都好得意.

佢哋嘅菜式就有少少西式元素.


哈,連紙巾同濕紙巾都印咗Q版嘅公雞圖案.


餐具之中仲有呢支個尾好似雞爪咁嘅鉗仔,中間有個環型小圈,可以將姆指同食指套入去,拎起嚟就更加方便.

同好多韓式炸雞店一樣都係有前菜,分別係醃蘿蔔,粟米沙律同小餅乾.醃蘿蔔酸香開胃,粟米沙律除咗粟米之外,仲有青瓜,甘筍同提子乾,小餅乾就的的骰骰,我以為係鹹嘅,原來表面嘅係砂糖嚟,都幾香脆.

我哋食咗炸雞雙拼,甜味炸雞上面灑咗杏仁片同香蔥,雞件表面就蘸滿醬汁,都幾香甜.原味炸雞嘅外皮就幾薄脆,炸得夠透冇多餘嘅油份,肉質唔算滑但又唔嚡,可以配附上嘅醬汁嚟食.


埋單走嗰陣仲拎咗佢哋嘅紀念品鎖匙扣,呢個這Q版公雞圖案真係好得意.

大致上唔錯 ~ 利小館

同人去利小館,叫咗幾樣嘢.

花雕醉雞以價錢嚟講個份量比較少,好彩當日係雞髀位,肉質比較多同嫩滑,味道就帶酒香唔澀.


陳醋雲耳入面加咗百合,青瓜,紅椒,酸香爽脆,都幾開胃.


XO醬煎蘿蔔糕,蘿蔔糕切成骰仔大小,不過XO醬味唔濃,糕身亦比較濕潤鬆散.


鮮蝦意式白汁意粉,粗身嘅意大利粉表面蘸滿白汁,當中有蝦肉,青紅椒等.奶味濃郁.有啲西式嘅感覺.


蜜汁火方,金華火腿表面蘸咗稠身嘅蜜汁,夾晌包子之間嚟食,既甜又中和咗金華火腿嘅膩感.


四喜烤麩,烤麩吸滿醬汁,都幾香甜,雲耳同花生就令成碟嘢更有咬口.


香檳汁海鮮焗飯,鋪咗厚厚芝士同醬汁焗成,下面嘅飯粒粒分明,同埋加咗啲海鮮,對芝士控嚟講都幾滿足.

希慎角落 ~ Green Waffle Diner

去咗銅鑼灣希慎廣場十三樓,新開冇耐嘅Green Waffle Diner.


呢度係晌商場走廊嘅側邊位置同半開放式嘅,不過都有少少嘢例如係廣告牌等等遮一遮,都唔算會一眼睇晒.


一入門口就已經見到沙律吧,定價五十幾至七十幾左右,係港島區嘅正常物價.


當日有五款口味,分別係紅菜頭,南瓜,粟米,雞胸肉同煙肉沙律,睇個樣都好似唔錯,仲有埋卡路里做參考,對於注重健康嘅人就最啱.


之後就坐咗入去.


佢哋窗邊嘅都係梳化卡位嚟,坐得都幾舒服呀.


望出去雖然唔算好高,同埋係望樓,不過都算開揚.


佢哋仲晌啲窗台上面放咗啲植物做點綴.


餐牌個感覺都好田園風.


連水杯上面嘅花紋都好靚,好似所有嘢都係為女仔而設咁.


有見班蘭熱香餅係佢哋嘅新品,咁就叫咗嚟試試.


賣相非常非常吸引,影咗好多張相先捨得食.


熱香餅嘅蛋漿只係加咗班蘭葉打成嘅汁液,每片都幾厚吓,聞落幾有蛋香,食起嚟鬆軟同帶啲蛋糕口感,味道甜中帶微鹹,食完都冇涸喉感.


熱香餅頂部仲有啲粉紅色糖絲,個質感有少少似中式龍鬚糖外層嘅龍鬚,甜度恰到,每層都搽咗鮮忌廉同灑咗焦糖碎.伴碟就有切片鮮士多啤梨,鮮藍莓,焦糖碎,薄荷葉,食用花同糖漿等等,佈置到成個小花園咁,水果天然嘅酸味亦可作中和.



之後就試咗杯Cafe Latte,拉花都幾靚,仲飲到咖啡回甘.

留意返,其實我去嗰日都冇留意,係之後上網睇返人哋啲相,先發現原來佢哋有個下午茶餐都有班蘭熱香餅,不過就話細份小小,同埋我睇人哋啲相係冇我呢份散叫嘅咁多食用花同水果,因為我呢份散叫係貴下午茶餐嗰份成三分一,仲係唔連嘢飲架.見到散叫同下午茶餐個賣相有分別,對我嚟講都總算有返少少安慰.