真係晌轉角位 ~ 轉角見

呢度嘅環境有啲似有少少裝修嘅港式快餐店.

我食咗型男漢堡,個芝麻麵包都幾香,中間嘅漢堡扒係用鮮牛肉打成,都幾厚呀.同埋仲有芝士,煙肉,番茄,紅菜頭,生菜,沙律醬,酸酸哋咁,又有少少雜菜嘅脆口感覺,大個得嚟又唔會好滯.

薯條就麻麻哋,唔係好脆.

綜合嚟講OK ~ 上品私房菜

蓮子銀杏瘦肉燉冬瓜入面有冬瓜,蓮子,銀杏,瘦肉,響螺,薏米.飲落冇咩味精,都幾似住家湯水.

黃金蝦,外面包住一層鹹蛋黃,因為蝦殼已經炸到脆脆哋,幾乎可以成隻就咁食,咁當然要咬多幾下先吞啦.


椒鹽鮑魚,已經將入面啲內臟清走,再起肉蘸漿油炸,食落唔韌,上面啲炸蒜蓉同辣椒令佢仲惹味.


花雕蛋白蒸蟹,隻蟹嘅肉唔多,蛋白都幾滑溜,不過花雕味就好似濃得滯,搶咗蟹嘅鮮味.

清蒸海斑,呢個就比較普通.

糯米雞,我哋原本以為係平時食嘅普通糯米雞,點知係原隻雞包住荷葉蒸,入面就釀咗糯米.出到嚟先切開再加花生同蔥花.咁樣食原隻雞嘅糯米雞都係第一次,可惜個飯索咗好多雞汁,食落都幾濕,雞肉本身唔算嫩,明明係心機菜,但好睇唔好食.

士多啤梨骨,個士多啤梨汁酸酸甜甜幾消滯,唔錯.

 XO醬甜豆炒帶子,甜豆脆口,同帶子一齊食幾夾,不過有人就覺得個XO醬辣咗少少.

最後仲有杞子圓肉燉雪耳,甜度對我嚟講岩岩好,幾清新.

綜合嚟講OK,係糯米雞味道比較失色.