迷你杏仁餅 ~ 恆香

農曆新年期間有人買咗幾盒迷你杏仁餅俾我哋,包裝入面有一個透明膠盒,打開之後可以再扣緊,咁就可以保持新鮮.雖然如此,我都會習慣再用密實盒保存.



每個迷你杏仁餅上面都印咗店名中嘅恆或香字,的的骰骰,就好似一個個五元硬幣咁,不過就比硬幣厚一啲啲.盒嘅背面就詳列咗有乜成份,分別係綠豆粉,砂糖,花生,食用豬油,杏仁,杏仁油等等.食落口感偏實,但總算香脆,杏仁味非常非常非常明顯,入面嘅花生同杏仁碎仲可以增強咬口.

幾好嘅開始 ~ Subway

去咗Subway食早餐,我叫咗火腿套餐,朋友就係燒雞胸肉套餐.



同樣揀咗意式芝士包,店員之後就會將個麵包稍稍烘一下.



跟餐嘅百事可樂轉咗農曆新年特別版,佈滿公雞圖案都幾靚呀!



自己覺得肉類之中以火腿比較輕盈,蔬菜方面我對橄欖嘅喜好唔大,但又未至於討厭,只係唔會刻意去揀,呢次就要咗生菜,番茄,青瓜,酸瓜同墨西哥辣椒.既爽脆又有口感,當中仲有微微嘅辣味,同埋加咗蜜糖芥末醬,味道酸酸甜甜咁,都幾唔錯.



呢份就係朋友嘅,以六吋嘅潛艇堡做早餐,蔬菜又夠多同豐富,係個幾好嘅開始.

熱辣辣 ~ PHD

Order咗PHD,唔知係唔係因為呢個時間冇乜人叫,間嘢仲未好忙,所以呢次嘅食物都非常熱辣辣.

輕盈沙律,加埋油醋汁拌勻,車厘茄,青瓜,粟米,菠蘿,生菜都幾清新爽口,食啲蔬菜墊底,感覺好似好少少,又唔怕食得太膩.



網上訂滿$180送嘅咖哩角,上次雖然係即時食,不過已經係微溫,呢次就熱辣辣嘅,外皮脆卜卜,入面嘅咖哩餡又惹味.



蜜糖BBQ雞翼,同之前一樣肉質軟嫩,調味又唔會過份濃郁.



脆香雞,另有蒜香牛油蜜糖同江南醬味,不過朋友唔鍾意花巧,所以每次都只食原味.外皮香而微鹹,佢最鍾意上髀,雞肉較多,啖啖肉嘅,我就鍾意下髀,骨位拎起嚟食比較方便,亦好似比較酥香.



拿破崙海鮮意粉,晌眾多意粉焗飯之中,呢款嘅性價比似乎最高,近期仲可以揀配長通粉或螺絲粉.番茄醬底加咗蝦肉,魷魚,小青口,蟹柳同菠蘿等,意粉唔會過腍,酸酸甜甜咁,每次食都冇太大落差.



PHD多寶,每次都會揀番茄醬類嘅薄餅,其中最常食嘅就係什錦類款式,呢個有辣肉腸,五香肉粒,雞肉,蘑菇,青椒,洋蔥,餡料分佈均勻,辣肉腸令佢更有咬口,但呢次嘅芝士份量唔算多,唔太有拉絲效果,好彩批底仍然鬆軟而帶少許脆口感.

甜一甜 ~ 美心

晌美心買咗兩件切餅甜品嚟食.

牛奶慕絲杯嘅杯邊上面印咗啲好似乳牛咁嘅黑色斑點圖案.上面就有鮮忌廉,中層牛奶布甸扎實滑溜,另外兩層就分別係牛奶慕絲同埋原味嘅海綿蛋糕,整體嘅牛奶味都幾濃郁.



牛奶慕絲切餅就用咗乳牛花紋嘅透明包裝紙包住,同埋插咗張乳牛造型嘅公仔硬咭紙,賣相都幾可愛.底層係oreo脆脆餅底,上面嘅牛奶慕絲綿密,夾住嘅原味海綿蛋糕鬆軟,同埋有微微彈性,唔會太甜太漏,不過牛奶味就好似比慕絲杯輕咗少少.

拜年賀禮 ~ 奇華

農曆新年期間有人買咗盒奇華出品嘅蝴蝶酥嚟屋企做拜年嘅賀禮,佢個紅色鐵盒上面嘅圖案簡約得嚟都幾得體.

忍唔住即刻打開嚟食,盒入面分別係六小包嘅獨立包裝透明袋,每包入面各有三塊蝴蝶酥,咁就可以每次食少少,唔怕通風.

蝴蝶酥外表有少少似心形,體積就屬於中型大小,同埋比某某馳名曲奇店嘅出品厚身少少,表面就蘸咗好多粗粒嘅砂糖,咬起嚟酥脆,當中仲有啲牛油香,而沾晌手上面嘅油份都唔算好多,感覺都唔錯,又唔會太甜太膩,我自己都幾鍾意.

盆菜 ~ 太興

朋友訂咗盆極品鮑參花膠至尊盆菜,另外跟咗隻不銹鋼大湯勺,長筷子一對,耐熱膠碗,筷子同湯羹約十隻,大湯勺嘅質素唔錯,可以循環再用.



除此之外仲跟埋娃娃菜,日本金菇菜,芋絲,枝竹同一支原味盆菜醬汁.



盆菜入面有十幾款食材,分別係原隻蠔皇鮑魚,紅燴海參,厚切花膠,海蝦,原粒瑤柱蠔豉福袋,秘制豬皮,紅炆花菇,南乳豬手,家鄉鯪魚餅,紅燒鮑菇,燒肉,明爐燒鵝,桶子油雞,健康素鴨,雲耳,清甜蘿蔔同五香荔芋.

盆菜用咗外層係金色嘅不銹鋼大盆載住,可以直接用明火或電磁爐慢火加熱至煮沸即可.我哋一齊由最面層開始食,慢慢食到底,十多種之中我只係食咗其中幾款.

鮑魚彈牙唔韌,海參軟腍,花膠有咬口,小小嘅福袋就用咗日式腐皮包著瑤柱,蠔豉同髮菜等等,口感豐富.其他食材如豬皮,雲耳,杏鮑菇同蘿蔔都吸滿醬汁,非常惹味,食到尾聲時仲加咗金菇菜,芋絲,枝竹等等去煮.

盆菜嘅醬汁就好有南乳鹹香,烹調時吸收咗食材嘅鮮味,加上水份揮發,令醬汁愈煮愈濃稠,中途只係加熱水都覺得夠味,所以成個過程都冇加嗰支跟埋嘅原味盆菜醬汁落去.

厚福街沾麵 ~ 元祖沾麵專門店

嚟到厚福街嘅元祖沾麵專門店.


裝修同我食過嘅拉麵店有啲分別,反而比較似食壽司之類嘅食店.


不過就有面向牆嘅吧檯,如果一人個嚟都唔怕太尷尬.


佢哋嘅沾麵同拉麵都有幾款口味揀,例如係赤蝦,龍蝦等等,當中芝士海膽系列最特別,另外仲有其他小食同飲品等等.


同坊間嘅拉麵店一樣係用畫紙仔嘅方式叫嘢食,沾麵只可以揀麵量,湯拉麵就可以揀麵嘅軟硬度同粗幼度.


檯上面放咗一排調味料,分別有黑胡椒,七味粉,昆布醋,餃子沾汁,白芝麻,其中黑胡椒同白芝麻嘅樽係即磨設計嘅.

當眼位置仲貼咗食沾麵嘅整個流程,簡單易明.


我試咗最基本嘅豚玉魚介沾麵,等咗陣店員就拎咗兩碗嘢嚟,呢碗係麵條,叉燒,半熟蛋,紫菜,青檸,大蔥同竹筍.


另一碗就係用石鍋載住嘅魚介沾麵湯,個鍋嘅熱力令湯汁拎到嚟時仍然係沸騰狀態,氣泡同熱氣不斷冒出,咁樣就可以用嚟保持沾麵湯嘅溫度.而呢度嘅沾麵湯係用豬骨等熬煮,之後再加魚介而成,湯質落嚟濃稠,表面凝結咗層厚厚嘅油脂.先淺嚐一啖,有黏黏嘅口感,又有啲魚乾鮮香,用匙羹撈一撈,仲發現湯入面有粒豚角.


睇咗餐牌,得知佢哋嘅沾麵麵條係採用日本小麥粉製成嘅粗麵,亦即係極太麵,比一般嘅較粗身.用筷子夾起再放晌沾麵湯浸一浸,麵質咀嚼起嚟煙韌彈牙,冇唔討好嘅鹼水味,因為面積較大,所以亦好易掛湯.


叉燒表面油光閃閃,捲得扎實,肥肉同瘦肉嘅比例一半半,咬起嚟爽口而帶啲鬆化.


半熟蛋食起嚟軟滑,不過拎到嚟時蛋黃已呈半凝固唔夠流心.另外嘅紫菜就可以用嚟吸一吸湯內嘅油份,大蔥就可以提味,唧埋青檸汁就多咗份酸香兼可減膩感.

食完啲麵條之後就可以請店員加啲木魚湯,就可以飲晒成碗沾麵湯喇! 當晚附近啱啱好有人叫咗赤蝦沾麵,佢個碗傳嚟陣陣鮮香,下次再嚟嘅話試吓先.

花園街老店 ~ 奇趣餅家

呢間花園街入面嘅奇趣餅家,門外總係堆滿食客.




售賣嘅唐餅都係佢哋自家手工製,晌而家嘅香港真係愈來愈少見.



紅豆燒餅係佢哋嘅招牌貨之一,另外仲有原味,不過我每次都只買有餡嘅.



拎返去途中仍然暖暖哋,燒餅表面有啲白芝麻晌度,同埋有少少油份,應該係用嚟防止癡底.


糯米皮煙韌軟熟,中間紅豆蓉餡均勻微甜,焗得非常香口.

呢次仲買咗另一款傳統唐餅嚤囉酥,佢哋嘅出品外型有啲似皮蛋酥,又有啲似小餐包.

同平時食嘅中式有餡酥餅唔太一樣,佢外皮嘅口感鬆化到好似菠蘿包嗰層脆皮咁,中間包住嘅椰蓉餡甜度啱啱好,食完都唔覺得膩.

海鮮西餐廳 ~ The Captain’s House

去咗尖沙咀嘅The Captain’s House.



係間專門食海鮮嘅西餐廳.



餐檯上面有張好大嘅餐墊紙,上面印咗餐廳嘅龍蝦LOGO.



餐牌就用藍色做主調,呢次試咗佢哋幾款菜式.



先係兩款生蠔,分別係來自美國嘅Pacific Rock,同法國嘅Majestic.前者海水味較淡,肥美爽口,後者海水味較重,味道鮮甜.各有各好,我哋就比較鍾意Majestic多少少.



卡彊小龍蝦芝士醬配墨西哥脆片.



碗入面有好多小龍蝦肉,質感緊實有嚼勁,當中夾雜咗水牛芝士同車打芝士混合而成嘅芝士醬,用墨西哥脆片蘸嚟食都唔錯.

我哋以為伴碟嘅原隻小龍蝦係模型,原來都可以食嘅,將殼剪開起肉,鹹鮮味幾突出.



焗大啡菇煙肉芝士球,煙肉交織晌大啡菇之上,外型好似菠蘿包咁.



煙肉焗得微脆香口,下層用咗兩個大啡菇夾住水牛芝士同番茄粒,好似大啡菇版漢堡包咁,食落多汁唔乾身.伴碟嘅雜菜仲加咗番茄粒,松子仁碎等等,配黑醋汁嚟食既有咬口又唔膩.

舊式地踎 ~ 好輝煌餐廳

嚟到呢頭食晏,見到好輝煌餐廳門口隻貓幾得意,於是就坐晌室外.



朋友叫咗蝦仁炒蛋飯,蝦肉幾多,蛋煎得香口,同埋加咗青蔥同淋咗豉油提味,賣相就好似家常菜式咁,都算有誠意.



我就係金牌焗豬扒飯,即叫即焗,所以都等咗幾耐,朋友嗰碟飯就嚟食完先拎到出嚟.




面層鋪咗幾多芝士碎,焗到微焦兼可拉出芝士絲.下層稠身嘅港式茄汁酸甜度適中,豬扒似係用咗美極之類略為調味,外層蘸上蛋漿半煎炸至金黃,同埋已經預先切件,食得幾方便.最低層嘅飯入面加咗炒蛋絲,不過睇落唔似炒底,好彩米粒煮得唔爛唔硬兼粒粒分明.份量對我嚟講啱啱好,味道算係好食,不過如果可以加少少番茄肉或洋蔥等等就仲有口感.


兩份餐都跟咗飲品,呢日天氣有啲熱,我哋就同時叫咗凍奶茶,茶味唔濃,朋友講味道有啲似台式奶茶,但飲起嚟都唔差,亦唔會死甜.