蜜糖磚塊之外 ~ 茶木台式休閒餐廳

成日見啲人話去試佢哋嘅蜜糖磚塊,不過就對佢哋其他嘢食嘅印象比較模糊.

水果冰紅茶,個紅茶係Lipton出品,水位岩岩好晌樽身0.5L刻度上面,唔知係唔係指有500ml? 佢入面有藍莓,橙,士多啤梨,火龍果,青檸,檸檬,味道甜甜地,仲有啲類似熱情果汁嘅酸味,我覺得佢比較岩女仔嘅口味多啲.



我仲試咗金黃鹽酥雞同紅燒牛肉麵.金黃鹽酥雞係岩岩炸起,仲加咗啲炸九層塔上去,調味唔係好突出,口感香脆.紅燒牛肉麵個湯底肥油比例可接受,味道幾濃, 無乜太鹹或重味精嘅feel,佢張餐牌寫係用手工寬麵條,咬起來煙韌彈牙,牛肉就燉得腍軟,紅蘿蔔同白蘿蔔亦煮得透,香甜無渣.

想試佢哋啲蜜糖磚塊,但已經太飽喇.

不過不失 ~ 翠河餐廳

想快快食完就走,就去咗附近間翠河.

叫咗菠蘿豬扒焗飯同熱奶茶,個焗飯拎嚟時啲汁仲晌度冒緊熱氣泡,證明係即叫即焗.

上面啲芝士碎數量都唔少,底下就係蛋炒飯,飯炒得幾乾身.豬扒就預先切咗幾件,食得方便啲.而個醬汁入面就有紅蘿蔔,西芹,薯仔同洋蔥,不過就唔多覺有番茄肉或番茄皮,食落冇咩酸味同甜味，係一般茶餐廳常見嗰種港式茄汁嘅感覺.

親子蛋飯Tastic ~ 麥當勞

親子蛋飯Tastic,個包裝盒同入面張紙都係梳乎蛋,好得意.

用咗香菇米飯代替麵包,中間夾咗蛋黃醬,蛋餅,炸雞扒同荷蘭醬.蛋餅入面仲有粟米,胡蘿蔔同青蔥,味道唔單調.炸雞扒就有少少似麥香雞包嗰個雞扒,但換咗做脆辣雞腿包嗰款炸漿.配搭上都見用心,可惜荷蘭醬酸度麻麻,甚至俾蛋黃醬搶咗,而香菇米飯亦幾多油份,都幾滯.

所有食材分開食係唔錯,加埋一齊就有啲啲膩.

煎餃 ~ 美味餃子店

呢度除有自家人手包製嘅餃子外,仲有車仔麵等食物,然而我係為餃子而來,已別無他選.

佢哋只有雲耳椰菜肉餃,韭菜肉餃,白菜肉餃三款口味,然後就係湯餃或煎餃,細碟(七隻)或大碟(十隻)之分,選擇上可謂貴精不貴多.


煎餃係雲耳椰菜肉餃拼韭菜肉餃,外皮煎得乾身呈金黃色,有如細細嘅金元寶,雖然某幾隻餃子開口裂開,但外觀仍算吸引,且可清楚睇到均等嘅摺痕.

煎嘅雲耳椰菜肉餃餡料爽口,餃皮就幾香脆,韭菜餡嘅香味就比較濃烈.
 

枱上面仲有可以自己隨意添加嘅調味料如紅醋等,當中以自製菜脯最為吸引,入面混有豆豉同辣椒片,辣度頗強,食落既香又惹味.可惜冇樽裝發售,如果唔係就可以買返去慢慢食喇!