外賣自取韓式烤雞 ~ Goobne

呢排Goobne出咗個限定嘅外賣自取優惠,揀任何一款烤雞再加韓國菜式就有九折.



過開呢頭,就外賣自取嚟試吓.



嗰日唔多人,所以店員都好好人咁俾我坐晌入面等.


呢度嘅環境睇落好好,下次有人陪嘅話嚟堂食先得.


我等咗陣就拎得喇.


呢排仲會送聖誕特別版陶瓷杯,不過係送完即止嘅,個杯嘅造型好似咖啡杯咁,摸上手都幾厚身,質素睇落唔錯.


有見自取返去都要一啲時間,所以就揀咗本身係凍食嘅海螺筋麵,面層鋪滿切絲青瓜,胡蘿蔔,洋蔥,紫椰菜,生菜等等,螺肉切得算大,口感彈牙惹味,底下嘅筋面煙韌有嚼勁,配上白芝麻同韓式辣汁,撈勻之後既美味又辣得過癮.


深層芝士烤雞,拎返去時已聞到陣陣誘人嘅香氣.


面層灑滿車打芝士,忌廉芝士同藍芝士等等嘅芝士粉,份量都幾多.


用嚟裝烤雞嘅係兩層厚身紙盒,唔係好保到暖,拎到返去已經變凍咗少少,不過佢係烤雞而唔係炸雞,所以都冇外皮變腍嘅情況,肉質都仲算嫩滑,芝士粉食落甜甜哋,亦冇令人口乾嘅感覺.