灣仔街市附近開咗間專賣滷水食品嘅潮州滷,嗰晚仲有唔少街坊幫襯,睇嚟都幾受歡迎.
原本想試滷水豬手再加其他嘢,可惜已經賣晒.
所以呢次只係試咗滷水豬耳,腩肉,雞翼同豆腐.
拎到返去一打開個盒就已經傳嚟陣陣滷水香味,佢哋另外仲跟咗兩包醬汁.
個盒子已經係較大size嘅發泡膠盒,不過仍然塞得滿滿.
滷水雞翼,我初初以為只係雞中翼,原來係雞全翼,仲會主動幫人斬埋件.每隻都幾飽滿,食起嚟皮脆肉嫩.
滷水腩肉嘅肥肉部份軟腍唔膩,肉質算鬆化唔癡牙.
滷水豬耳,都幾爽口同易咀嚼.
滷水豆腐質感扎實,外皮煙韌,算有豆香同冇乜渣.
呢度嘅滷水以鹹味為主,甜味稍輕,不過食材嘅質素唔錯,當中以豆腐同豬耳嘅表現最突出.
沒有留言:
張貼留言