確如店名 ~ 幾好粉麵茶餐廳

原本想食愛群確如店名炸髀,不過又俾我哋發現呢間幾好粉麵茶餐廳,門面睇落應該係八九十年代嘅產物.


一個舖位係茶餐廳,另一個就係麵包店,呢種模式嘅食肆晌未徹底重建嘅舊式公共屋邨都幾常見.


入面啲裝修陳設就幾新淨.


唔知係唔係曾經翻新過?


餐牌上有唔少插畫,都幾得意,但定價以公共屋邨嚟講唔算平,感覺唔太大眾化.


檯號唔係用數字編排,而係由英文字母A開始嘅人名,冇留意係唔係由A到Z,不過佢哋啲檯的確唔少,我哋呢檯係Christy,真係好得意.


朋友叫咗叉燒燒鵝飯,佢話叉燒係半肥瘦嘅,燒鵝亦皮脆肉香.


我就係下午茶嘅法式西多士,以一整片厚身白方麵包蘸蛋漿炸成.


中間冇其他餡料,不過油份適中,牛油夠香,未知係唔係因為自設麵包店嘅關係,貨源較新鮮,好似比平日茶餐廳食到嘅軟熟,配上糖漿感覺唔錯.


餐飲方面朋友揀咗凍檸茶,佢話紅茶茶味幾甘香濃郁.我就叫咗晌茶餐廳比較少見嘅薑汁紅棗薏米水,跟下午茶餐都唔洗額外加錢.

薑汁味恰好唔辛辣,入面有兩大粒完整嘅紅棗,我將佢哋搗爛再拌勻,飲落就更香甜,薏米嘅份量非常多,煮得腍中帶嚼勁,飲完後既暖胃又美顏,好養生嘅感覺.

雖然定價唔算大眾化,不過食物質素確如店名咁"幾好".