去到鐵路博物館附近嘅仁興街,附近有唔少車房,當中有間叫Chef Restaurant嘅餐廳,起初睇到中文名叫肥哥哥餐廳,以為係港式茶餐廳,實際上係間西餐廳嚟.
佢嘅裝修唔算花巧,牆上油咗黃色拼淺藍,同埋擺咗唔少盔甲士兵公仔.
當中仲有黃藍配佼佼者minions嘅牆貼,都幾有童心.
除咗樓下外,原來樓上都有座位.最入嘅牆上面貼咗唔同形狀嘅氣球,有啲似開生日會咁.
同香港大部份餐廳一樣,餐檯擺放得較密,但尚可接受.
朋友一坐低就話要食漢堡,最後叫咗兩個漢堡午餐.
原條魚柳漢堡,要求咗店員幫忙切開,炸魚柳長得連嗰兩片漢堡麵包都遮唔晒,外表睇落幾霸氣.
雖然炸魚柳又長又厚,但外層唔係朋友期待嘅啤酒炸漿,而係吉列嗰種,口感較粗,好彩算脆身,魚肉肉質亦滑.麵包烘得外脆內軟,中間夾住番茄片同紫生菜增加爽脆感,醬汁就酸酸甜甜,食落唔會太膩.
芝士安格斯牛肉漢堡,同樣要求店員切開.
同樣有番茄片同紫生菜,另有一片半溶芝士,安格斯牛肉漢堡扒非常厚身,估計約為2cm多,質感扎實肉汁較少,口感卻鬆化唔韌,當中仲加咗啲香草等等,味道濃郁,縱使冇醬汁都唔淡口.口味偏重,我覺得可接受,不過愛清淡嘅話就可能會覺得漢堡扒嘅調味稍鹹.
兩份漢堡午餐都跟埋扁平長身嘅粗薯條,炸得夠透,外脆內粉,仲非常非常非常飽肚.
即磨咖啡,濃淡度適中,冇苦澀感.
熱檸茶,有兩片鮮檸檬,紅茶就用小茶壺載住,同埋用咗兩個茶包沖泡,一壺大約可以倒兩杯出嚟,都幾抵飲.
沒有留言:
張貼留言