對於元朗人嚟講,雞地呢個名應該唔會陌生,網上指出即係青山公路元朗段以南,鳳翔路以東,元朗公路以西,下攸田村以北一帶,係因為呢個地段晌多年前曾經係家禽市場,所以就有咁嘅稱呼.
呢邊聚集咗唔少食肆,而當中嘅Darci by Aldou同同區嘅Aldou Café係姊妹店,不過門面上睇就比較型格一啲,呢晚就試下佢哋嘅晚餐.
是日餐湯係意式番茄湯,湯質幾濃,入面有打碎咗嘅番茄蓉,飲起嚟酸甜.法包就外脆內軟熟,蘸湯食都唔錯.
燒原條魷魚筒墨汁意粉,燒魷魚筒上面仲有啲蟹籽,肉質厚身爽滑香口.意粉表面均勻咁蘸咗黑色嘅墨魚汁,煮得彈牙有咬口,味道鹹香惹味.
澳洲肉眼扒八安士配燒汁,肉眼扒有牛香,仲可以蘸燒汁或者黃芥末嚟食.呢次揀嘅生熟度比較有嚼勁,下次會叫返生少少.
伴碟有法邊豆,粟米,珍珠筍同紫薯蓉,前三款脆口,紫薯蓉入面有一絲絲纖維,但口感幾滑.
沒有留言:
張貼留言