大埔名物除咗三多炸雞髀同華輝蘋果批外,最令我感興趣嘅就係客家糍粑.反正嚟到附近,咁就去朝下聖.
明明地址寫住晌廣福道,不過沿路都搵唔到滑嘟嘟嘅舖位,之後見到對面馬路有張大橫額大約寫住”往滑嘟嘟請轉入同秀坊”,好彩佢哋有呢個指示,如果唔係我哋應該會錯過咗,似乎有唔少慕名而嚟嘅人都遇上差唔多嘅情況.
到達後發現附近有唔少外賣為主嘅食店,滑嘟嘟門外仲堆咗一堆企晌度食豆腐花同芝麻糊嘅食客,聽講呢兩款甜食都係用店入面嘅電動石磨磨製,當日仲傳嚟一陣陣誘人嘅黑芝麻香.
我對客家糍粑比較感興趣,佢哋係用人手即叫即包,睇住店員將糯米團搓扁再包餡料嘅整個製作過程,的確幾開心.
好彩當日輪候嘅人唔多,大約等咗幾分鐘就買到.每人每次限買六個,我哋兩個人就總共買咗一打.
客家糍粑用咗透明膠盒載住,每個之間仲墊咗蛋糕紙保護,防止佢哋癡埋一齊,由呢個微小嘅舉動睇得出佢哋都幾有心思.
外表圓圓,個子大大.
糯米皮薄,軟熟煙韌,入面嘅花生同黑芝麻磨得細碎,份量夠多,有啲咬口又香甜,食落真係唔錯.
沒有留言:
張貼留言