流連在摩天輪 ~ Bel Cibo

嚟到H8十二樓嘅Bel Cibo, 入口嘅碎裂紋玻璃牆上面貼咗多張食客嘅即影即有.


呢次坐晌窗邊卡位,感覺都幾舒服.


我哋幾個試咗幾樣嘢食,先係 西班牙風乾火腿紅茄多士,西班牙風乾火腿香口冇渣,中間就有切粒番茄同洋蔥.底層嘅牛油多士外脆,內層就稍稍被番茄沾到微微濕潤.
 
香芒鮮蝦塔野菜沙律入面嘅蝦肉彈牙,配鮮芒果粒食都幾清新,伴碟嘅雜菜沙律份量唔少,淋晌表面嘅芒果汁甜甜酸酸,撈勻嚟食幾開胃.


摩天輪小食拼盤好似細細嘅摩天輪咁,輕輕用手指推一推仲可以轉,都幾好玩.
































每籃都放住唔同嘅小食,分別有芝士丸,雞翼,蝦多士,八爪魚丸同炸薯條,每款各四小件,炸薯條就有一籃.

呢個拼盤仲跟埋切條西芹,青瓜,甘筍同車厘茄,正好中和炸物嘅熱氣感.另外仲有兩款醬汁,橙色嗰個食落有啲似千島醬,白色嘅就似係加咗芥末嘅沙律醬.
蟹肉龍蝦汁墨魚麵入面有蟹肉,車厘茄,洋蔥同三色椒,同埋用咗龍蝦汁去煮,味道鮮甜.墨魚汁意粉煮得剛好唔硬唔軟,灑晌表面嘅粟米片就可以增加咬口.
口乾乾,決定試埋飲品.

餐廳最吸引嘅地方係可以晌水吧試飲手工啤酒,試到啱先叫.


試咗果味為主嘅Wittekerke Rose同Floris Beer Apple,我覺得前者嘅果酸味香,比較啱女仔嘅口味.


Mojito就有打碎咗嘅鮮薄荷葉同幾瓣青檸,飲落酸甜.


熱水果茶分別係紅西柚味同芒果味,紅茶入面仲有幾粒罐頭雜果,甜甜哋咁都幾討好.