有心串燒店 ~ 三品燒鳥專門店

同人嚟到三品燒鳥專門店.



走入去之後又係另一番景象,裝修陳設就好似身處晌市區嘅日本料理店咁.



佢哋係間專賣日式串燒嘅食店,午市時段仲有多款定食,價錢由$48至$98不等.



主餐牌嘅菜式就用類別或肉類區分,其中雞串燒嗰頁最吸引,有十多款唔同處理方法嘅串燒,當中仲有比較少見嘅部位,例如係雞頸肉同雞心等等.雞嘅日文係鳥,難怪佢哋用燒鳥專門店自居.



我哋試咗一份秘製燒鰻魚定食同幾款串燒等等,定食包括兩款前菜同一款日式沙律,當日係漬蘿蔔、中華沙律同柚子醋沙律,都幾酸甜開胃.另外仲有麵豉湯,入面有油豆腐同香蔥,鹹香度啱啱好.



秘製燒鰻魚肉厚肥美,燒得嫩滑甘香,淋上嘅醬汁令佢仲惹味.下層米飯軟糯,仲灑咗紫菜絲,撈埋醬汁咁食的確唔錯.



秋葵,用咗木魚碎點綴,外皮燒得爽口,內層滑溜.



茄子,師傅特登晌茄子皮上切出多個井字花紋,茄肉軟綿,上面嗰啲薑蓉辛口,仲起咗衝擊作用.



雞肉釀冬菇,冬菇香口,中間被雞肉徹底填滿,食落有趣.



煙肉日本蠔卷,煙肉燒到微微焦脆,日本蠔就鮮味有肉汁.



五花腩,肥膏部位有油香,肉質鬆化.



牛脷,我最鍾意晌日式料理店食牛脷,燒好後口感格外爽脆.



牛肋肉,灑咗唔少黑椒碎調味.



由中間睇牛肉生熟度啱啱好,味道突出有嚼勁,我哋都覺得佢嘅表現比牛脷出色.



一骨雞翼,上面嗰隻嘅賣相好似嘴唇咁,哈哈.



師傅先將雞翼切開起肉,同埋只係留低一支骨,再用竹籤串好,不過冇整穿雞皮.雞皮燒得焦香微脆,冇外皮保護嘅雞肉冇過份乾身.睇落簡單,但就幾花心機同時間.



雞肉棒棒,店員話係由師傅手打而成,雞肉軟滑有咬口.將蛋黃同自家調製嘅醬汁撈勻,再蘸嚟食嘅話仲juicy惹味.



最後試咗兩款飲品,黃林蘋果汁濃郁甜香.長野縣白桃汽水味道清新,一邊飲有氣飲品一邊食串燒,感覺都幾爽.

餐牌上面印咗佢哋總廚同大廚嘅相,當日正正就由總廚負責串燒,感覺佢幾友善親和,同我印象中總廚都係板住臉嘅可謂截然不同.

(呢次啲相有啲失焦,不過好食就得喇!)

女神雞 ~ ChirChir

又去ChirChir,呢度入口有好大個宋仲基.



入口處附近仲有好多雞公仔.



裝修同而家大部份新派韓式炸雞店大同小異,店入面電視仲不斷播放韓國MV.



呢次就食咗玫瑰芝士女神雞,個名好搞鬼.



鐵板上面鋪滿水牛芝士碎,同埋加咗車厘茄,青椒,紅椒,西蘭花同炸薯角,店員仲會淋埋忌廉芝士汁上去.堆疊到好似小山丘嘅炸雞已經去骨,每件都好似姆指咁大,食落幾方便.



水牛芝士碎同忌廉芝士汁撈埋一齊之後質感較稀,但仍然拉到絲,食完炸雞之後店員就會加碗白飯入去兜炒勻.



飯粒吸滿芝士,都幾好味,不過食完成盤都參透唔到佢同玫瑰,女神有乜關聯.



茲樂茲樂美極了,菜名同樣得意,去骨炸雞浸晌忌廉芝士汁同巴馬臣芝士片之中,當中同樣加咗雜菜.炸雞食落有啲辣味同黑椒香,意大利粉冇煮得過腍,有啲似晌度食卡邦尼嘅感覺.相對起嚟芝士味較玫瑰芝士女神雞輕,但都唔錯.

繁華之外 ~ Aldou Cafe

去咗元朗,食咗想試好耐久嘅Aldou Cafe.餐廳晌中低密度住宅區入面,同大馬路嗰邊人撞人咁確係天壤之別.


入面就係淺藍色為主,當中仲有啲有關小狗嘅佈置.


呢邊窗邊係高身檯,外面行人唔算多,一邊睇住街景一邊用餐,感覺唔錯.

午餐時段只有九個選擇,好彩想食嘅都有.


是日餐湯係番茄湯,湯質幾濃,入面有啲切得大粒同明顯嘅鮮番茄粒,飲落微酸有忌廉香.另外嘅半個法包就稍為烘暖,外皮挺身帶脆,拎嚟蘸湯食都唔錯.


蟹肉南瓜忌廉意大利飯,用咗櫻桃蘿蔔同香草點綴,蟹肉完整量多,肉爽唔爛,淋上黑松露醬令佢仲香口.



意大利飯被南瓜染成橙黃色,煮得幾軟腍易咀嚼,仲加咗啲切絲洋蔥同厚切雜菌增加咬口.



香桃芒果凍果茶,輕輕攪拌時可以清楚睇到杯入面有細碎果肉晌茶中飄浮,飲落淡香微甜,感覺唔錯.

芝皇脆邊 ~ PHD

晌人哋度order咗PHD一齊食,叫咗個M1套餐,另外再加幾隻脆香雞.

輕盈沙律,蔬菜有生菜,青瓜,粟米,菠蘿,車厘茄,配黑醋橄欖油簡單開胃.



忌廉雞蓉粟米湯,我冇飲到,不過睇落都幾濃稠嘅.咖哩角配泰式醬係晌網上訂滿$180送嘅,上次食好似係啱啱炸起,非常脆卜卜,呢次外皮就明顯腍身咗少少,但仍然算係香口.



脆香雞,雖然餐廳主打批薩,不過炸雞嘅表現一啲都唔差,外層炸皮微鹹惹味,雞肉又嫩又唔乾,幾乎每次都會叫嚟食.



芝士白汁雞皇長通粉,平時多數會叫拿破崙海鮮系列,呢次朋友就叫咗呢款.配料除咗有雞肉外,仲有切絲青椒同紅椒.長通粉都幾腍,白汁嘅芝士味稍為弱咗少少,味道唔差但又唔算特別好.



食批薩多數會揀番茄醬底嘅口味,呢次又叫咗PHD多寶,鋪面嘅配料如辣肉腸,雞肉,五香肉粒,磨菇,青椒,洋蔥同芝士份量唔少.



我哋仲加錢轉芝皇脆邊,應該撈咗兩款芝士,估計係水牛芝士同車打芝士,批邊鬆軟,芝士煙韌鹹香,味道同口感都唔錯.



野莓果凍,放咗粒鮮藍莓做點綴,下層果凍之中有好多類似果醬咁嘅果肉顆粒,酸味都幾強,但對我嚟講唔錯.  

開揚午餐 ~ EAT ME Bar & Restaurant

嚟到油麻地地鐵站附近嘅譽發廣場五樓新開冇耐嘅EAT ME Bar & Restaurant,lift門一打開就係餐廳.



餐廳嘅面積唔細,裝修係工業風路線.場中間仲有個特大投影屏幕,當日仲不斷播住K-POP MV.



其中兩面係落地玻璃窗,當中仲有一列吧檯位.



雖然係樓望樓景,不過距離都幾遠,日頭嚟都幾開揚舒服.



以油尖旺區嚟講,午餐嘅定價算平,晌四十五至六十蚊不等,未知係唔係新張營業嘅關係,午市時段仲不設加一,同同類型餐廳相比,可謂抵食.



餐廳仲有款名為白雪公主嘅特飲,好似好得意,其他特飲嘅配搭亦唔太常見.



呢日想食清少少,於是試咗煙三文魚帶子沙律.



煙三文魚卷成玫瑰花形,賣相好靚,質感軟綿,鹹味係偏向較清嘅嗰種.帶子的的骰骰,咬起嚟彈牙唔韌.雜菜沙律入面有菊苣同紫生菜等等,用咗油醋調味,食落酸香爽脆.

食到尾聲先發現原來碟上面印咗雲石圖案,又幾靚喎!



好多款飲品都想試,最後就揀咗個配搭比較輕巧嘅玫瑰蘋果醋,晌側面睇係漸變嘅紅色,杯底仲有粒乾玫瑰花,飲落係淡淡嘅甜,都幾清新.



對餐廳嘅是日甜品雪糕球幾有興趣,於是叫嚟試試.呢日嘅雪糕係芒果口味,用咗白、淺黃、淺粉紅同粉紅色嘅超迷你棉花糖點綴,同埋用縮小版平底鑊咁嘅器皿上碟,講真係有啲預期之外.雪糕食落煙韌而有微微黏性,當中仲有少少挺身嘅芒果肉,我覺得質感有啲似gelato.雖然芒果味輕,但甜度唔高,感覺唔錯.

呢日日頭嚟印象良好,搵日夜晚同朋友再嚟試試晚餐先得!