手拍青瓜,青瓜爽脆,醬汁酸香微辣,飲茶時食少少蔬菜,感覺唔錯.
香麻叉燒酥,酥皮表面佈滿白芝麻,的確好似個名咁幾有麻香,中間嘅叉燒餡亦冇將個外皮整到濕軟.
家鄉咸水角,餡料係豬肉碎同沙葛等等,糯米皮炸得脆身而煙韌,我都幾鍾意呢種口感.
潮州蒸粉果,半透明嘅澄麵皮包住豬肉碎,花生,沙葛,芹菜等等,皮唔厚唔薄,係我成日食嘅點心之一.
山竹牛肉球,免治肉打得扎實唔鬆散,當中仲有切碎咗嘅芫茜同馬蹄等等,下層就用咗鮮竹墊住.
金勾炸兩腸,腸粉米漿加咗青蔥,蒸好之後再將油炸鬼捲起,本身應該會係外軟內脆嘅質感,但因為油炸鬼唔係即時炸,脆度就稍為爭少少.
香芋酥盒,第一次食呢款點心,綠色酥皮,邊緣沾咗白芝麻,賣相好似燒餅咁,食嗰陣熱得燙口,我小心咁咬開,原來入面包住淺紫色嘅香芋蓉,味道甜甜哋,都唔錯.煉奶炸饅頭,我冇食到,所以都描述唔到係乜味.
呢度嘅價錢都算合理,水準又唔會太過參差,啲位排得密集但未至於動彈不得,如果唔洗搭檯嘅話都算舒服.
沒有留言:
張貼留言