呢晚同人去咗炑八,雖然呢邊先係正門,不過因為商場入面有翻新工程圍晒圍板,所以反而冇咁當眼.
側門就晌扶手電梯附近,相對起嚟比正門仲更加顯眼得多.
入到去一坐低,店員就一口氣拎咗幾碟前菜嚟,即刻將成張檯堆滿,分別有切片青辣椒,大蒜同埋酸酸哋嘅漬蘿蔔.
當然唔少得泡菜,甜甜辣辣咁,又唔會過份地辣,連平時唔太食得辣嘅人都應付到,洋蔥嗰碟就可以用嚟做燒肉嘅沾汁.
同好多韓國菜一樣,呢度都有免費水提供,入面仲加咗片檸檬.
呢度嘅爐邊有兩個坑位,其中一邊用嚟擺芝士粟米,另一邊就用嚟整泡菜蛋.遇熱後嘅半溶芝士粟米可以輕易做出牽絲效果,都幾吸引,而且芝士粟米同泡菜蛋都係可以無限添加,我哋追加咗至少四次,食得好滿足呢！
怕就咁食燒肉會口乾,所以呢晚我哋就叫埋嘢飲嚟試.魔法梳打其實係藍蝶花加梳打水,拎到嚟之後店員先倒埋檸檬汁入去,睇住佢由紫藍色變成紫紅色,的確幾得意,飲起嚟就酸酸甜甜.
呢杯西柚汁暫時得呢間分店先有,上面放咗塊切片西柚,味道酸而有少少甘澀,感覺都幾天然.
然後就叫咗幾款燒肉同熱食嚟試,1++韓牛巨大牛小排‧Big Boss,個名好特別,唔難令人聯想起早年一套人氣韓劇.牛小排成片完整咁拎嚟,面積比我哋嘅手仲要大得多,同埋仲用咗雞髀菇,南瓜,磨菇伴碟.
牛小排大到唔能夠將成塊拎去燒,於是就用較剪將佢一分為二,輕輕咁將兩邊燒至微焦再切件嚟食,咬起嚟油香豐富,都幾滿足.
梨汁雞肉,燒好之後皮脆肉嫩,以為用咗梨汁調味應該係甜甜哋嘅,食起嚟味道就有少少鹹,不過都幾惹味.
炑八厚切五花腩配特製韓國魚醬,碟上面仲有南瓜同白本菇,發現餐廳嘅燒肉大部份都會跟少少可以拎嚟燒嘅蔬菜.
五花腩切成厚身長形,先將成件拎去燒,再跟住肉上嘅切口剪成條狀,燒多陣就食得.
豬皮脆中帶幾分煙韌,豬肉鬆化又冇乜肥膩感,跟埋嘅特製韓國魚醬鹹香,蘸嚟食都唔錯.
芝士熔岩飯,鐵板中間放咗韓式炒飯,之後店員就會加蛋漿同大量嘅芝士碎落去.
跟住再晌我哋面前將佢撈勻,只見店員牽出一絲絲芝士絲,牽絲程度媲美日本嘅納豆,場面都幾壯觀.
雖說年多前曾捲起熱潮,但呢次我係第一次試.飯粒都幾有嚼勁,每啖都係芝士香,難怪大受芝士迷歡迎.
沒有留言:
張貼留言