門面仿日本鳥居設計嘅奈良上釜,晌登龍街之中都幾顯眼,由網上得知原來佢仲係香港第一間日本釜飯專門店,而且啱啱開冇耐咋.
門外放咗個電動嘅巨型釜飯裝置,又幾得意.
呢日嚟到嗰陣仲未到營業時間,不過等咗陣就可以入去.
入面嘅裝修偏向簡潔,坐位亦比較密集.
佢哋用嘅茶杯印咗中式圖案,同埋係有連貫性可以連成一幅畫嘅. 
佢啱啱開業冇耐,暫時就只有釜飯,啲侍應講遲啲會有蕎麥麵等.
我哋就試兩份釜飯,兩份都跟漬物,沙律,茶碗蒸同味噌湯,我嗰份奈良七盛釜飯仲額外跟埋煮物,刺身同水果,單睇都覺得豐富.
當日刺身有油甘魚,吞拿魚,甜蝦各一件,前兩者都係厚切嘅,不過油甘魚就有少少魚筋,好彩吞拿魚幾鮮味有魚香,甜蝦就甜美.
煮物有切粒嘅胡蘿蔔,蘿蔔,牛肉同露筍,煮得軟腍入味,尤其係胡蘿蔔同蘿蔔幾乎入口即化,牛肉肉味香,甜中帶鹹,係類似壽喜燒嘅味道.
茶碗蒸入面有原隻蝦肉,海膽,三文魚籽,鳴門卷,冬菇等,上層係凝結成啫喱咁嘅高湯,下層嘅蛋蒸得夠滑溜,海膽仲令佢更鮮甜,三文魚籽就可以增加咬口.沙律方面原來係冷豆腐,用咗芝麻醬調味,同埋灑咗啲木魚碎,豆腐質感扎實,但口感唔硬,亦冇出水情況.漬物有白蘿蔔等,都幾爽脆開胃.
所有釜飯都係用原個鋁製釜鍋再加木蓋咁出場,同埋係即叫即製嘅.
奈良七盛釜飯入面有蟹肉,海蝦,鮑魚,三文魚籽,白本菇,冬菇,三葉芹,荷蘭豆同切成花形嘅胡蘿蔔,差唔多鋪滿整個飯面.
先食上面嘅配料,海蝦係中小型size,鮑魚就肉厚彈牙唔韌.
蟹肉就撕成一絲絲,可以用嚟撈飯.
晌網上得知佢哋嘅米粒係產自日本宮城縣嘅夢幻之米,再用多種材料烹調出嚟嘅高湯煮成,煮後仍然有微微通透感,不過又唔會過乾,又唔會過份濕潤,食起嚟軟糯煙韌,近鍋底位置嘅米粒仲被煮至微焦,猶如日本版煲仔飯咁,咬起嚟就仲香啲,只不過比冇燶嘅米粒較癡牙.
三文魚籽另上,咁就唔怕被鍋內嘅熱力影響口感,撈飯食又得,又或者就咁食都OK.
味噌湯入面有腐皮,豆腐,昆布,配料份量幾多,湯味啱啱好唔死鹹.
水果就分別係哈蜜瓜同士多啤梨,餐後食都唔錯.
朋友嘅鰻釜飯都唔錯,鰻魚煮得軟綿,醬汁都幾惹味.
對女仔嚟講釜飯嘅飯量都幾多,男仔食就啱啱好.
沒有留言:
張貼留言