去咗稻香打邊爐,雖然食過N次,但好似冇乜影過相.
任用嘅自助區每位收$14,有基本醬料如蒜蓉,蒜炸,辣椒,香蔥,唐芹同豉油等等,飲品方面有各式罐裝汽水,另有水機果汁,夏枯草,洛神花山楂紫貝天葵,豆漿,沙冰等等,仲有中式糖水如芝麻糊,紅豆沙等等.
我哋叫咗個椰椰芝麻雞鍋餐,另外加咗幾款食物同任用自助區.
象拔蚌,可以生食,亦可以放入鍋度涮一涮嚟食,鮮甜冇腥味.
黑豚肉,薄切得嚟口感唔錯,肉質亦唔癡牙.
安格斯肥牛,咀嚼起嚟冇渣.
桂花蚌,我冇食到,不過睇樣似乎唔錯.
廣島蠔,食落Creamy中帶啲爽口.
墨魚滑,我事後先發現原來一塊都冇食過.
羊肚菇,之前聽講過呢款食物,口感脆脆,幾過癮.
四寶丸,有墨魚丸,鯪魚丸,豬肉丸同蝦丸,彈牙但唔太食到鮮味.
黃金脆竹卷本身已經稍腍,不過吸晒啲湯咁都唔錯. 炸魚皮就非常香脆,表面沾有辣粉,令佢更惹味.
彩虹一籃子,分別有冬菇,秀珍菇,粟米,南瓜,車厘茄,小棠菜,生菜,娃娃菜同西洋菜,蔬菜都算嫩綠,份量仲唔少,食多啲菜感覺都好似健康啲.
之後仲飲埋自助吧嘅飲品同糖水,熱飲用嘅杯都幾得意.
沒有留言:
張貼留言