附近有間華御結,好早之前已經想買嚟食,就趁呢晚買堆返去同人share.
佢哋嘅御結有十幾款口味,仲會不時推出新口味,呢次就一口氣買咗八件御結,總共七款口味,其中一款重覆嘅.
其中四件加錢轉咗做餐,個餐有埋餐湯.野菜番茄濃湯,入面有切粒番茄,胡蘿蔔,馬鈴薯,西芹,椰菜,洋蔥,紅腰豆,牛肉等等,湯質非常濃稠,酸酸甜甜咁.和風豆乳骨膠原雞湯,湯料有本菇,胡蘿蔔,腐皮等,不過我冇飲到,所以講唔到係乜味.
八件御結七款口味,原本想食明太子沙律,可惜當晚已經賣晒.於是揀咗青森原粒帆立貝,合桃醬油玉筋魚,本格和風燒牛肉,燒鰻魚,高級三文魚,吞拿魚沙律,芥末章魚.
佢哋嘅御結標榜採用日本新潟出產嘅秋俵米,依指示輕輕力撕開透明包裝膠袋,紫菜就會將米飯包住.雖然佢哋嘅御結放晌雪櫃保存,米粒卻冇因此變得死實,相反咀嚼時仲帶煙韌軟糯口感,之不過紫菜有啲偏腍,但以預製食物嚟講都叫尚可接受.中間嘅餡料集中晌御結下面,比例大約佔三分一至四分一左右.
高級三文魚御結冇加其他醬料,口感稍為單調.吞拿魚沙律御結就撈咗沙律醬,相對起嚟比較惹味.芥末章魚御結入面嘅切粒章魚肉同胡蘿蔔絲等等幾爽口,芥末味輕而唔嗆.本格和風燒牛肉御結嘅牛肉帶微微醬汁味,軟腍唔韌.
另外嘅口味之中以燒鰻魚御結最為香口突出,青森原粒帆立貝御結同合桃醬油玉筋魚御結就冇令人留下深刻印象.
另外仲買咗黑糖蜜番薯,炸番薯外面蘸咗薄薄一層黑糖蜜,同埋灑上黑芝麻點綴,質感有啲似麥芽糖,又有啲似拔絲番薯,都幾香甜.
佢哋嘅御結大小適中,餡料比例唔算多,對我嚟講又唔算少,食一至兩個已經好飽.米粒口感唔錯,調味唔濃,可取嘅係餐牌上例出所有食物嘅卡路里含量供參考,一件御結先百多卡路里,對女仔嚟講未嘗係個既飽肚又唔會口寡寡嘅選擇.
雖然取代唔到日本當地嘅御結,不過都算係個唔錯嘅慰藉.
沒有留言:
張貼留言