九龍灣Achacha嘅環境昏暗,其中幾張係高身嘅長方形bar枱,另一排靠牆嘅就係二至四人枱.
呢度除咗係西餐廳,亦都有賣酒,所以牆上掛咗唔同嘅啤酒空樽做擺設.
枱面都有唔同品牌嘅啤酒空樽,可惜餐廳仍未申領到酒牌,所以暫時只設外賣,唔可以堂飲.
有見晚餐大約百幾至二百幾蚊左右就包餐湯,前菜,主菜,甜品同飲品,於是就叫咗嚟試下.
鮮果茶,現場所見可以清楚睇到份量唔少嘅原粒紅莓同搗碎咗嘅紅莓肉.
忌廉湯入面有幾多切粒馬鈴薯,胡蘿蔔,西芹等等,調味剛好.麵包摸起來扎實,烘得外皮微脆,食起嚟鬆軟有彈性.
久候多時嘅焗金文不芝士配麵包條拎到嚟時香氣撲鼻,金文不芝士上鋪滿蒜蓉等等,焗得香甜軟綿,芝士味夠出但又唔嗆,都真係幾好味,等得耐啲都算值得.
太極扁意粉即係黑松露同白松露,松露味非常非常非常突出,但又唔會過份濃郁.忌廉汁加咗多款雜菌如香菇同本菇等等,仲有洋蔥粒提味同增加口感.扁意粉煮得爽身,亦較長而幼身嘅意大利粉更易掛汁.
有聞元朗分店嘅crepe幾馳名,所以我就算覺得有啲飽都要叫香蕉朱古力法式薄煎餅配雪糕試埋佢。法式煎餅薄脆中帶韌性,面層同夾晌中間嘅鮮香蕉片已完全熟成,配上朱古力醬甜度恰到,冇想像中咁漏.雪糕方面有雲尼拿,印度香料茶同椰林飄香三款口味,當中以印度香料茶最為少見,所以我就揀咗佢,肉桂同丁香等等香料嘅味道濃郁稍甜,既特別又有趣.
原來呢度有室外座,問准侍應後就走出去參觀下,面向九龍灣大廈嘅景致,都幾開揚,其實同商場另一邊嘅露天公眾地方好近,只係簡單咁用啲大木桶稍為遮下.
呢度同室內又係另一種氣氛,於是買咗支九龍灣啤酒外賣嚟呢度飲,佢係一支晌香港釀製嘅手工啤酒,一邊睇住九龍灣夜景,一邊飲住九龍灣啤酒都唔錯.
百幾至二百幾蚊（未計加一）左右就包餐湯,前菜,主菜,甜品同飲品,跟餐嘅前菜亦唔似廉價貨,賣相味道都唔錯,質素完全超出預期,對得起呢個價錢,甚至係超過有餘.
沒有留言:
張貼留言