Souffle Pancakes ~ Whitewood Coffee

近日Souffle Pancakes當道,唔少地方相繼推出一系列有關嘅甜品,呢日就試試沙田嘅Whitewood Coffee.

佢係晌新商場入面,場內仲有少少吉舖,不過人流尚算適中.門面就比較簡約,旁邊嘅玩具店櫥窗陳設就好豐富,如果唔係特登嚟嘅話或者好易會被忽略.

入口位置放咗唔少擺設,當中不乏同咖啡有關嘅嘢.



佢哋嘅面積唔算大,半開放式廚房就成為店員收銀,沖咖啡同烹調食物嘅地方.



裝修唔花巧,以白色同木製用品為主,身處其中令人感覺放鬆.



其中一面係落地玻璃窗,透入唔少天然光線.



原來呢度可以清楚睇到馬鐵站,站入面乘客營營役役,同咖啡店嘅食客相映成趣.



小小嘅咖啡店,但就有提供意粉同甜品等等,麵包仲係佢哋自家手工製.



佢哋係自助模式嘅,先去收銀處叫嘢食,再去自助吧拎餐具或水等等,然後坐低等候店員拎啲嘢食嚟.



先嚟杯Rose Caffe Latte,拉花圖案特別,咖啡甘香,甜味啱啱好,玫瑰味就比較輕微.



嚟到我最期待嘅草莓梳乎厘鬆餅,呢日等咗大約半個鐘,不過飲住咖啡,上上網咁等,時間都算快過嘅.



三塊堆疊晌一齊嘅梳乎厘鬆餅,賣相都幾吸引.



切開鬆餅嗰陣已經感覺好軟綿,橫切面睇起嚟有啲似海綿蛋糕,放近個鼻就可以聞到蛋香,食起嚟質感鬆軟,同埋有淡淡嘅呍呢嗱味,入口稍稍咀嚼即化.面層灑咗糖霜,伴碟嘅鮮草莓同草莓醬酸味較輕幾清新,點埋奶味較重嘅鮮忌廉嚟食,香香甜甜咁都唔錯.

按店面大小嚟講店員算多,不過全部集中晌半開放式廚房入面工作,偶爾就走出嚟收碟.食物方面梳乎厘鬆餅嘅等候時間雖然比較長,但對我嚟講尚可接受,至少當日唔駛等一個鐘,整體印象良好.