嚟到婚紗店林立嘅尖沙咀金巴利道,當中嘅Moshi Moshi門面好顯眼.
餐牌封面有啲似水松木,內頁就印咗食物嘅相.
我哋叫咗幾樣試試,包括丼物同串燒等等.
熱情果紅茶係用伯爵茶茶包沖出嚟,味道酸甜.
鰻魚丼用咗長方形便當盒裝住,睇起嚟幾豐富.
鰻魚切成三件,入口軟綿,醬汁鹹甜適中,飯上面仲有啲蛋絲,撈埋白芝麻一齊食幾惹味.
另一邊就係蔬菜為主,分別有紫薯蓉,西蘭花同雜菜沙律,小小一球嘅紫薯蓉,食起嚟幼滑又有少少纖維口感,甜味唔重.雜菜沙律就淋咗日式芝麻醬,幾解膩.
京蔥和牛串入面嘅和牛厚切成一粒粒,軟嫩有肉汁,同埋用咗京蔥相間,香口又唔會太過重口味.
豚肉露筍串嘅豚肉表面金光閃閃幾多汁,中間包住幼身嘅露筍,爽嫩冇渣,兩樣嘢加埋嚟食幾夾.
沒有留言:
張貼留言