呢間Wistful Cafe係晌田心村村屋地下,距離大圍站先五分鐘步程左右,穿過公園側邊嘅停車場就嚟到,比想像中方便.
晚餐時段嚟,所有嘢都係散叫,同埋可以加$18升級做套餐,包餐湯同飲品,我哋就叫咗少少嚟試.
預先放咗芝士粉,tabasco同黑椒粉晌張檯上面,可以自由任用.
煙三文魚沙律入面有切條煙三文魚,番茄,雜菜同麵包粒,醬汁就有凱撒汁同黑醋橄欖油汁兩款,我哋要咗後者.切條煙三文魚微鹹,蔬菜口感爽脆.番茄水份唔多,啖啖茄肉咁.黑醋橄欖油汁入面仲有啲黑椒碎,味道酸甜清新.
自家製牛肉漢堡配薯條,我哋仲要求店員將佢切開一半,方便share嚟食.
芝麻麵包夾住番茄,紫生菜,酸青瓜,煙肉,芝士同牛肉漢堡扒,麵包外脆內鬆軟,牛肉漢堡扒打得厚身,煙肉亦都幾脆口,酸青瓜同其他配菜都可以中和滯膩感,都幾惹味.
沒有留言:
張貼留言