呢間餐廳嘅口碑唔錯,呢晚終於一試.
入口旁邊係廚房,雖然唔係半開放式,但就有玻璃窗,可以睇到廚師用心烹調嘅情況.
另一邊就係水吧,凍櫃入面擺咗各式各樣嘅酒精類飲品.
窗邊位睇落唔錯,有啲位仲可以睇到維港景,但就要預早訂位.
氣氛方面唔會令人太拘謹,可以輕鬆咁享用西式fusion菜.
呢度有一至二人套餐,唔啱心水嘅話都可以一款款咁叫.
Sparkling Juice即係白提子味嘅有氣飲品,個樣有啲似香檳,當中仲有切粒嘅鮮雜果, 味道酸酸哋咁.
Mandy’s Cure嘅中文名譯做文迪嘅治療,都幾得意.成份包括紅莓汁,西柚汁同青檸汁,清新酸甜.
香燒日本吞拿魚腩沙律入面嘅紫生菜,車厘茄,鮮菠蘿等等堆疊成一座蔬菜山,同埋有啲半透明嘅荔枝味爆珠,加埋黑醋食感覺醒胃.
日本吞拿魚腩被埋藏晌蔬菜之下,煎得焦香,肉厚之餘腩位又夠爽口.
松露煮日本年糕,醬汁加咗黑松露,又香又滑溜,同埋仲有蘑菇同洋蔥,扁平嘅日本年糕就煙韌有米香,都唔錯.
焗法國連殼食田螺,平日嘅法國田螺要起肉嚟食,呢度就可以直接將成隻放入口度.其實田螺殻係用麵粉整,我覺得佢脆脆哋好似威化餅咁,中間釀咗香草醬,田螺肉彈牙,墊晌田螺殻下面嘅薯蓉軟綿,可謂創意菜式之一.
黑松露蘑菇湯,湯入面有大量嘅蘑菇碎,口感滿足.
忌廉鮑魚冬陰海鮮湯,睇到個名時的確既驚訝又期待.中間放咗鮑魚,帶子,中蝦,草菇同蟹籽,賣相討好.湯嘅味道微辣微酸,同埋滲出淡淡嘅香茅清香,忌廉亦令湯質比一般嘅泰式冬陰公順滑.湯料方面鮑魚有咬口,帶子同中蝦亦算甜.
燒西班牙黑毛豬肋條肉,平時食豬肋條都係連骨嘅,而家就啖啖肉食得幾方便.餐廳採用嘅係用橡果做飼料嘅西班牙黑毛豬,所以會建議燒到八成熟,如果怕太生嘅都可以另外要求,不過就可能會稍稍影響肉嘅質感.
豬肋條肉淋咗燒汁,幾有嚼勁.伴碟方面都好豐富,茄子燒得香口,法邊豆脆身,芋頭蓉微甜粉嫩,撈咗羅勒葉嘅鮮菠蘿仲可以解膩.
燒牛脷配日本芥辣蜜糖汁,牛脷切得厚而細長,外脆內爽嫩,單食都夠濃香,亦都可以蘸日本芥辣蜜糖汁嚟食.
是日甜品日日都唔同,呢晚就係甘筍合桃蛋糕,氣孔比海綿蛋糕粗大,口感紮實但唔嚡,甜度唔高感覺健康.
餐廳特登將啲用嚟裝食物嘅碟整熱,咁樣就可以保持食物溫度,都幾細心.
