下晝去咗旺角彌敦道726號,呢楝大廈有好多間餐廳,呢日就試咗17樓新開嘅韓國過江龍吉列牛忌廉烏冬專門店.
每張檯上面都放咗個細細哋嘅爐仔,係用嚟燒牛肉用嘅.
對忌廉烏冬幾有興趣,但硬係覺得忌廉係甜食嘅,最後都係試咗吉列牛定食.
由唔少媒體報導得知餐廳用嘅係美國熟成牛肩脊,當日所見份量都唔少.
牛肉表面均勻咁沾上吉列炸粉,再輕輕炸脆,中間仲保持鮮紅色,放晌燒烤板上面每邊燒一兩秒,食落外脆內軟嫩.
我覺得牛肉本身已經夠味,不過都可以蘸埋個甜豉油或加咗蒜蓉嘅沙律醬提味.伴碟嘅椰菜沙律,同埋側邊嘅車厘茄同豆腐主要用芝麻醬調味,味道酸酸哋咁可以解膩.
定食仲有白飯,飯面灑咗飯素,食落惹味.麵豉湯入面就有昆布蔥花,味道唔會太濃.
整體嚟講味道唔錯,不過牛肉表層嘅吉列碎屑令燒烤板好易燒到焦黑,同咗店員反映,佢話之前係有塊生嘅蘿蔔跟埋嚟俾食客清潔塊燒烤板嘅,但因為曾經有食客食埋塊用嚟清潔嘅蘿蔔,餐廳為防止再有同類型情況發生,而家就改咗直接換過另一塊新嘅燒烤板,不過就要自己同店員提出喇!
沒有留言:
張貼留言