自選套餐 ~ 囍鍋

嚟到囍鍋,佢哋有幾款套餐揀,我哋就試咗$398一位嘅自選套餐.



之後店員拎咗一堆小食醬料嚟,不過呢晚我都幾乎冇蘸到醬料.



蒸氣鍋係利用水蒸氣將食物蒸熟,可以保持食材嘅原味又唔熱氣,蒸嘅時候蒸氣同食物本身嘅水份又會流返去石鍋底.當晚店員仲加咗排骨,南瓜同白米等等晌鍋底度,咁就可以同時晌上層蒸架蒸食物,下層石鍋煮粥喇.



個餐仲包飲品任飲,我哋揀咗可樂同Jolly Shandy.



椒鹽脆豆腐,炸得都幾香口滑溜.



蟶子皇個size唔細,上面仲鋪滿蒜蓉同粉絲.店員將佢放晌蒸架,再調較時間,唔洗幾耐就蒸好咗.



蒸煮時間啱啱好,肉質香甜,加埋蒜蓉仲惹味.



番薯蜆,比普通嘅蜆大隻好多.



味道鹹鮮,同埋完全冇沙.



當晚仲有蝴蝶蚌,聽店員講唔係成日有架.



蒸熟咗個樣真係有少少少少似蝴蝶,味道方面就幾爽口.



個餐仲有甜品,我哋揀咗千層糕.



層層分明,薑汁味濃郁,質感煙煙韌韌咁.



最後食埋個粥,除咗南瓜同排骨之外,原來仲加咗蝦米同瑤柱,令佢多咗啲鮮香味.