去咗荃灣嘅稻八食日式火鍋放題,入面裝修係木為主,都幾舒服.
同埋掛咗唔少燈籠,幾有日本feel.
牆上仲有用貓做主題嘅壁畫.
佢哋仲有藤籃俾食客擺個人物品,又有BB櫈,切合唔同人士嘅需要.
放題限時兩個鐘,收費方面就按牛肉等級區分,呢次試咗$238一位嘅極上安格斯牛小排放題,可以任點任食刺身同幾款肉類,其他火鍋料,炸物,飲品同甜品等等就晌自助區自取.
自助區嘅醬料有蔥花,辣椒,蒜蓉,芫茜,芥辣,醬油,芝麻醬,柚子醋,辣椒七味粉,胡椒海鹽等等,前菜就有蒜味螺肉,中華沙律,雜菜,車厘茄,青瓜,枝豆,粟米粒,子薑等等.
蔬菜分別有皇帝菜,生菜,旺菜,南瓜,冬瓜,番茄,木耳,翠玉瓜,蘿蔔,粟米,蓮藕,冬菇,雞髀菇,金菇,其他火鍋料有油揚豆腐,枝竹,魚蛋,龍蝦丸,豬肉丸,墨魚丸,牛肉丸,芝士丸,海膽丸,蟹籽丸等等.
另外仲有提供比較飽肚嘅粉麵飯之類.
三個大雪櫃入面放咗最少十幾款飲品,常見嘅有可樂,七喜,亦有烏龍茶,綠茶,柑桔檸檬等等.
除咗無酒精飲品之外,佢哋仲有加$20任飲Asahi啤酒嘅優惠,不過就要全檯人一齊加錢,亦可以只係俾$20單買一杯.如果本身鍾意杯中物嘅話,任飲的確比單買抵飲一啲嘅.
呢個放滿Dreyer’s嘅雪糕櫃好吸引呀,而且係比較貴價嘅D-Collection系列迷你裝,唔少日式火鍋放題都係按人頭俾,呢度就係任食,都幾難得.
自助區入面仲有個特別嘅角落,可以俾食客自製炸物,聽店員講佢哋係第一間由日本引入呢款炸串機嘅食肆,旁邊嘅雪櫃就放咗幾款用竹籤串好嘅食物,例如鮮蝦,冬菇,青椒,茄子,秋葵,一口番薯,芋頭魚餅,香腸,炙燒芝士丸等等.
晌自助區拎完食物就埋位食嘢喇.刺身有油甘魚,吞拿魚,三文魚,希靈魚,馬刀貝,北寄貝,八爪魚等等揀.不過我哋只係試咗其中幾款,油甘魚有魚油甘香,馬刀貝爽口,吞拿魚鮮味冇筋,甜蝦如果甜一啲就仲好.
火鍋湯底揀咗九州豬骨濃湯.
店員一口氣拎咗一堆任點任食嘅肉類嚟,分別有極上安格斯牛小排,日本北海道雞片,美國自然豚肉片同羊肉,我哋試嘅$238放題仲一份海鮮盛合.
極上安格斯牛小排,放入鍋度輕輕涮一涮就得,食落幾軟嫩.
日本北海道雞片嘅肉質厚身,同埋有少少麻油香.
美國自然豚肉片,煮好之後鬆化唔癡牙.
羊肉入口有陣羶香,但味道討好.
海鮮盛合有虎蝦,帆立貝,青口,八爪魚仔同廣島蠔,整體鮮味彈牙,質素唔錯.
火鍋料方面我主力食蔬菜類,蘿蔔切得薄身易熟,南瓜香甜,生菜同皇帝菜就可以平衡肉類嘅滯膩.
食完火鍋,當然要試玩一下佢哋部炸串機.
首先自取想食嘅食物,然後沾上炸漿同麵包糠,再放入炸爐同按計時器,炸兩分鐘左右就得.
自家製嘅炸秋葵同炸一口番薯,配上天婦羅汁同蘿蔔蓉,外脆內爽甜.可能係自己有份參與,我覺得好好食呀.
最後緊係食埋Dreyer’s D-Collection雪糕,當日有藍莓芝士餅,開心果同呂宋芒果三款口味.另外仲有維記嘅迷你雪米糍,憑外表分辨唔到係乜味,打開後咬咗一啖,發現係綠茶味嚟.
走嗰陣發現入口附近擺咗啲日式祈福木牌,可以俾食客寫低祝福字句.
牆上仲有堆掛起咗嘅祈福木牌,咁樣睇都幾有特色.
任點任食嘅肉類質素唔錯,自助火鍋料選擇都唔少,最好玩嘅係可以用炸串機自製炸物,同埋仲有任食嘅Dreyer’s D-Collection雪糕,呢日7:30前離座仲有折扣優惠,CP值就仲高.
