如果唔係因為辣菜脯嘅話 ~ 金城

去咗金城食嘢.


餐廳入面貼咗好多勵志金句,例如係呢句"是非天天有,不聽自然無".


我哋叫咗兩份餐,揀咗熱奶茶同凍奶茶,茶味同奶味算平均.


沙爹牛肉通粉嘅通粉煮得稍腍,沙爹牛肉嘅份量就唔算少,肉質軟滑不失肉味.火腿奄列蛋皮煎得唔嚡,中間仲有蛋汁流出,火腿絲又唔會太鹹,夾晌搽咗牛油嘅白方包嚟食,即刻變咗做火腿蛋三文治.


肉餅飯嘅肉餅兩邊表面煎得焦脆,中間鬆化有肉汁,飯量足夠,仲跟埋條菜心晌度.


辣菜脯爽口,又香又辣,不論係配飯抑或湯粉麵皆惹味,真係幾好撈飯.

講真呢度嘅服務的確一般般,尤其係食客多嘅時候,要舉手好幾次先得到回應.如果唔係因為佢哋嘅辣菜脯,我諗都冇其他嘢更吸引到我喇.

飽餐一頓 ~ Bene Pizza + Pasta

同人去咗Bene Pizza + Pasta食晏,跟餐揀咗配南瓜湯,飲落微甜清淡.



主菜就係意式香草麵包配炸魚柳火箭菜及他他汁,入面仲有炸薯角同雜菜沙律伴碟.意式香草麵包軟熟同埋香草味好香,中間嘅魚柳炸得香脆,冇額外嘅油份,配上微酸嘅他他汁同埋澀澀哋嘅火箭菜,都幾惹味.



烤燒豬柳扒配香煎蘋果炸薯角及燒汁,豬柳扒燒得肉質鬆化,當中仲有唔少肉汁,蘋果就有焦香,底下仲有啲黃色綠色嘅意大利青瓜,夾埋一齊食都幾討好.


個餐包埋餐飲,我哋叫咗熱檸水,食完嘢飲下檸檬類嘅飲品,既健康又消滯.


食得飽飽,感覺唔錯.

銅鑼灣日本菜 ~ 焱丸水產

同朋友去咗呢間焱丸水產食晚餐.


餐牌每頁都係圖文並荗,好多嘢都想叫,最後只係試咗幾樣.


蟹籽蟹肉薯仔沙律用咗生菜托底,個外型好似朵花咁,爽脆嘅蟹籽下面係一絲絲蟹肉,最底層嘅薯仔加咗沙律醬,質感近乎薯蓉咁幾滑溜.


什錦天婦羅入面有海老,白身魚,南瓜,番薯,茄子,冬菇,青椒仔,海苔.海老有三件,青椒仔有兩件,其他款式都各一件,炸漿薄脆香口,冇過多油份,啲蔬菜仲留有汁液,唔錯.


芝士什錦海鮮盛即係鋪滿芝士嘅日式薄餅,上面仲有八爪魚,車厘茄同埋爽口嘅蔬菜絲.同意大利薄餅有少少分別,批底薄身,質感偏濕潤唔脆,有少少似御好燒嗰種粉漿煎餅,不過我冇求證,只係自己食完之後覺得質感近似.


海膽帆立殼燒,三文魚籽帆立殼燒.


兩款帆立貝都好肥大厚身,燒嗰陣仲加埋清酒同燒汁等,汁甜有牛油香.三文魚籽帆立殼燒入面啲三文魚籽燒完後咬起嚟彈牙,同生食嘅口感極之唔同,金菇,豆苗同青椒仔等仲吸滿湯汁精華.海膽帆立殼燒就多咗份海膽嘅甘甜鮮香,當中嘅蔬菜如鴻喜菇等亦同樣惹味.


再試埋梅乾梳打燒酎,成杯呈漸變粉紅色,搗碎咗嘅梅乾睇起上嚟仲有啲似櫻花漬,鹹酸中帶微微酒香,幾易入口.

珍芒果千層蛋糕 ~ 美心

我久唔久都會晌美心西餐買蛋糕同麵包之類嘅食品,呢次就同咗幾位朋友一齊晌度買咗呢個名為珍芒果千層蛋糕同人慶祝生日,呢款蛋糕成件都係黃色嘅,最上面係珍(真?)芒果果凍,中間仲有厚切嘅鮮芒果肉,然後配上食用金箔同埋印咗logo嘅朱古力牌做點綴,果凍下面就用咗芒果慕絲,鮮芒果肉同埋原味蛋糕等等相間而成嘅,個蛋糕食起上嚟嘅質感都幾鬆同軟綿,果凍就比較扎實,但就幾甜同香,鮮芒果嘅酸度唔高,夾埋一齊嘅味道都幾討好唔錯.

生拆雞絲粉皮 ~ 利小館

有陣時都會去利小館食嘢,每次嘅食物都冇太大落差.



呢次叫咗幾款,先係生拆雞絲粉皮,食之前將雞絲,青瓜絲,胡蘿蔔絲,粉皮同芝麻醬撈勻,食起嚟爽脆香口,都幾惹味.


然後仲叫咗木魚燒茄子,燒茄子上面鋪滿木魚碎同香蔥,睇起上嚟好有日式嘅感覺,可惜灑晌茄子表面嘅鹽都幾多兼唔太均勻,令到佢食落有啲偏鹹.


龍蝦濃湯烏冬配豬扒,烏冬冇話煮得太腍身,炸豬扒外皮薄脆,肉質唔韌,不過話就話係龍蝦濃湯,可惜冇濃稠嘅質感,鮮香味淡,相對起嚟就比較一般咗少少.

下午茶 ~ 翠河餐廳

呢日我同朋友去咗翠河,叫咗兩份下午茶餐.

跟餐飲品叫咗凍檸茶同熱奶茶,茶底都幾滑溜.


朋友嘅沙爹牛肉麵配奶油豬仔包半個,目測之下牛肉同公仔麵份量唔少,不過我冇食到,所以都形容唔到係乜嘢味.


雜果沙律配奶油豬仔包半個,沙律入面有罐頭雜果,馬鈴薯,粟米,冇出水等情況,係酸酸甜甜正常嘅味道,只係當中有啲碎冰,呢個可能同存放雪櫃嘅溫度有關,但影響唔大.

奶油豬仔包方面就烘得脆身,中間軟熟而帶韌性,上面搽咗牛油同煉奶,都唔錯.