清新食 ~ espuma

呢日去咗espuma,門口有好多黑板畫.



都幾靚呀!



餐牌入面啲菜式都幾吸引,好多都想食,揀咗幾樣試試.牛油果蝦沙律入面嘅蝦肉鮮甜,牛油果軟熟,芒果酸甜,加埋雜菜配油醋汁,食落開胃.



炸蟹鉗墨魚汁燴飯,每粒意大利飯都均勻咁蘸滿墨魚汁,同埋煮得外軟內有咬口,仲灑咗啲即磨芝士碎提味,蟹鉗方面炸得外面香脆入面彈牙,表現唔錯.



烤鴨胸紅菜頭意大利麵,鴨胸油脂唔多口感鬆化.意大利麵被紅菜頭染成紫紅色,煮得啱啱軟身有咬口,入面仲有切粒紅菜頭同乾番茄,味道甜甜哋都幾清新.





咖啡另外有本餐牌,款式都幾多樣化.呢杯棉花糖咖啡係凍飲嘅,頂層放咗輕輕燒焦咗嘅棉花糖,同埋用金箔點綴,杯邊就蘸咗朱古力,好似飲緊一杯甜品咁.

紅日閒遊科學園 ~ 花見月

去咗花見月食嘢先.



科學園嘅餐廳大多數都有好高嘅樓底,空間感十足.



同埋係玻璃窗,都幾開揚,



想試佢哋嘅魚生丼,又想食紅日限定嘅海膽配火炙三文魚班尼迪蛋,取捨之下只叫咗份定食.



定食包丼飯同前菜,亦可以加配和風野菜沙律,茶碗蒸同味噌湯,和風野菜沙律有紫生菜,車厘茄同粟米粒等等,配上日式芝麻醬都幾開胃,茶碗蒸入面就有冬菇,蟹柳,雞肉同銀杏,味噌湯就除咗昆布,豆腐之外,仲有唔少洋蔥.



呢份花見月特上魚生丼最少有八樣時令魚生,其中嘅三文魚腩肥美,吞拿魚有魚香,三文魚子有咬口,而牡丹蝦同海膽如果再鮮甜啲就仲好.

碗入面仲有甜玉子,蟹柳,酸薑同芥末,啲飯就加咗紫菜絲同飯素,食落軟熟而有啲煙韌口感.

我最後先食前菜,木耳微辣爽脆,漬紅白蘿蔔同青瓜就可以解膩.



見到佢哋有個獨立嘅咖啡吧,於是叫咗杯Cafe Latte試下,拉花細緻,奶泡亦打得好綿,咖啡味突出,冇被牛奶蓋過.

睇咗睇餐廳嘅facebook,原來佢哋嘅手沖咖啡幾馳名,下次再嚟嘅話都想試試.

宵與夜 ~ 深夜食堂

嚟到厚福街藍馬商業大廈嘅居酒屋,近月改咗名做深夜食堂,店名少不免會令人聯想起一個日本嘅知名漫畫.

佢哋嘅戶外座可以睇到厚福街一帶嘅繁華街景,晌呢種唔冷唔熱,氣溫啱啱好嘅日子前嚟,都算舒適.

餐廳有提供燒物,炸物同其他日菜,雖然前身已經開咗幾年,但呢晚我哋係第一次嚟試.



生燒牛脷芯切得厚薄適中,口感爽彈.



一口安格斯油光閃閃肉質軟嫩,簡單咁用鹽同黑椒調味已經足夠.



我以為豚肉露筍卷係一口氣包幾條露筍嗰種,實際係每條露筍都用咗豚肉片捲住,質感爽脆,醬汁又夠甜蜜,一口接一口,食得幾方便.



煙肉荔枝卷外層嘅煙肉有油香,入面包住荔枝可以解膩.



原隻烤菇燒得唔乾身,上面灑咗木魚碎,熱力令佢哋輕輕擺動,幾得意.



川式茄子上面有蒜蓉同辣椒粉,食起嚟甜甜辣辣.不過如果再濕啲啲就更好.



芝麻雞翼一碟有四隻,炸皮夠薄同香脆,調味濃郁.



芝士野菌玉子燒上面灑咗番茄醬同紫菜碎.



拎到嚟之後店員先將佢切開,玉子煎得滑溜,中間嘅芝士濃稠流心.



蒲燒鰻魚飯嘅鰻魚細長,雖然唔算肥美,但都幾軟綿鬆化.米飯咬起嚟煙煙韌韌,用嚟撈蒲燒汁食都幾惹味.

第一次試呢間,感覺唔錯.唯一缺點係室內冷氣好勁,食物拎嚟冇耐已經變凍咗.

鬧市omakase ~ Shika Teppan Yaki

|

第一次嚟試omakase,個set入面有前菜,刺身,鐵板燒,壽司等等.

 

龍蝦刺身切得比較厚,咬落爽脆.



牛肉薄燒好多汁,雖然有少少多油,不過就好有牛味.

 

壽司就係由師傅手握,帶子巨大鮮甜.



深海池魚就同埋薑蔥一齊食,魚味好出.



之後嘅金目鯛嘅魚味比啱先嘅深海池魚仲突出.



拖羅肥美,食落滿足.



海膽嘅質感幾軟滑,唔錯.



鰻魚卷中間包住紫蘇葉同蟹籽,加埋一齊食感覺唔膩.



喜知次係日本嘅高價魚,燒完之後點啲撈埋蘿蔔蓉嘅酸汁食,雖然算唔上驚為天人,但口感的確幾好.



然後就係龍蝦湯,入面有金菇等等蔬菜.



甜品係抹茶雪米糍,配埋紅豆蓉甜甜哋咁.