任食任飲海鮮餐 ~ 潮福蒸氣石鍋

之前都食過其他地方嘅蒸氣石鍋,今次就試呢間潮福蒸氣石鍋. 佢哋有個任食任飲海鮮餐,雖然海鮮同某啲食物唔係任食,不過都算豐富.

每人有盅燉湯,老黃瓜燉唐排嘅湯頭比老火湯清澈,湯料唔少.


脆皮乳鴿,炸得皮脆肉嫩.

晌我哋食緊其他嘢嘅同時,店員就晌石鍋加入瑤柱,鮮淮山同米粒,煮到最後就有粥食喇.

放埋不鏽鋼蒸架,再將海鮮放上去蓋好蓋,蒸一陣就食得.


貝殼盛盆,當日嘅係北寄貝同馬刀貝,兩款都係中型大小,同埋鮮味冇沙,北寄貝仲比馬刀貝多一份天然鹹香.


美國石蠔質感creamy,上面嘅薑絲,大蔥同胡椒味道濃郁,偏向重口味.


蟲草花清遠雞嘅雞肉嫩滑,味道幾好. 手剁鮮蝦丸同自製鮮牛丸就幾彈牙.


手切和牛肉咬落鬆化.

最後食埋個粥底就啱啱好,仲有西瓜跟埋,幾甜同多汁.

當晚擺食物落鍋到蒸好嘅過程都由店員負責看管，我哋幾乎冇郁到手。同埋佢哋嘅抽風唔錯,食完個身都冇乜異味.

都OK ~ 口甜舌滑

原本想食嗰間休息,咁就是但去咗呢間口甜舌滑,呢度係間食中式糖水嘅小店.


個餐牌都幾得意.


朋友叫咗芝麻糊同合桃露,餐牌寫兩碗都係手磨,食落分別唔係好大,芝麻糊就甜香啲啲,合桃露就多咗啲啲果仁味.


我哋仲叫多碗椰汁喳咋,入面有芋頭,紅豆,綠豆,眉豆,紅腰豆,三角豆同西米等等,佢嘅色調比起我之前晌其他糖水店食過嘅清澈,不過好在質感濃稠而唔稀,佢嘅甜度屬於輕微,豆類煮得軟腍而有咬口,但係椰汁味唔夠突出。

呢度糖水表現OK,如果晌附近食完嘢嚟又或者對於係附近居住嘅人嚟講都唔差嘅.

較易買到嘅蛋卷 ~ 蛋卷皇后

有唔少外地人都晌網上討論蛋卷皇后,有blogger仲話佢嘅品質媲美港島馳名老店XX號.


一向有聞XX號嘅蛋卷買來不易,一係就打電話預訂,不過線路多數繁忙,一係就親身去店外排隊,聽講有人天未光已經晌門口守候,真係幾誇張,可見XX號幾咁有人氣.

托朋友之福,我都曾有幸食過XX號嘅蛋卷,的確幾有烤香同蛋香.

而蛋卷皇后就有幾間分店,買起嚟比XX號易好多,咁就買咗罐食下,蛋卷做得挺身唔易碎,口感鬆化,算係唔錯,但烤香同蛋香就唔突出.

晌老店一罐難求嘅情況下,蛋卷皇后都算係較易買到嘅慰藉.

九龍城泰國菜 ~ 小曼谷

晌九龍城小曼谷食泰國菜,好多嘢都想試,但朋友唔太食得辣,都係揀啲唔辣嘅菜式,所以冇叫到冬陰公呢!


泰式拼盤,由蝦餅,魚餅,春卷,雲吞組合而成,我哋揀咗各三件嘅大size,以為會好似其他泰菜館咁精緻,但拎到嚟時我哋被佢嚇咗跳,蝦餅同魚餅嘅體積至少係其他地方嘅兩倍,同埋堆到好似小山丘咁.冬甩形嘅蝦餅彈牙,魚餅入面有豆角同辣椒等等,幾香口,春卷包住粉絲,胡蘿蔔同冬菇,雲吞就係蝦肉豬肉餡,外皮幾香脆.


配上餐廳自家品牌泰式酸辣汁,單張介紹係由泰國原裝入口,同埋用咗新鮮青檸,再加辣椒,魚露,蒜蓉同糖調製而成,酸香微辣,就算食唔到辣嘅同行朋友都食到,甚至幾鍾意.


泰皇咖哩炒海鮮,咖哩汁加咗蔥同辣椒等等,食起嚟偏甜唔辣,仲加咗蛋花令佢增加濃稠感,感覺惹味.海鮮有大蝦兩隻,以及青口,大蜆,魷魚等,整體肉質爽彈,份量唔少.


鮮菠蘿雞肉炒飯,配料分別係鮮菠蘿,雞肉,蛋絲,雜豆,洋蔥,提子乾同肉鬆,睇落豐富,可惜炒飯調味略淡,相對起嚟較為失色.


青檸菠蘿沙冰(後),沙冰打得非常綿密細碎,菠蘿同青檸味都突出,飲咗之後幾消滯.

世事變幻莫測 ~ 文華冰廳

呢日約咗人,見時間尚早就去咗文華冰廳食少少嘢.


門口設有餅櫃,入去之後就係濃濃嘅真懷舊港式冰室風格,當日仲有啲外藉旅客.

呢度啲位都幾迫幾窄,卡位亦被佔據,於是就同其他食客搭檯.



我叫咗份特餐,牛油餐包,火腿奄列,沙爹牛肉麵同熱奶茶三十蚊唔洗,以旺角嚟講都幾平.


牛油餐包食落鬆軟而富彈性,有牛油香同甜香.火腿奄列嘅蛋煎得唔鞋,夾晌中間嘅火腿絲唔死鹹.沙爹牛肉麵嘅沙爹牛肉份量唔少,調味濃度適中,冇被鬆肉粉醃得過頭,仍食到一啲肉香,麵量亦非常多.


熱奶茶茶味唔算濃郁,但口感順滑.

食完之後就聽到呢度快將結業嘅消息,只能夠講世事變幻莫測,真係有啲可惜.

童心香蕉船 ~ 甜魔魔

去咗呢間甜魔魔,等咗陣就入得.


入面啲位都幾迫,甚至連行路都唔係太暢順.


呢度係以新派甜品為主,窩夫,心太軟,綿綿冰,乳酪,中式糖水等都有,可謂集百家之大成.


好似冇乜較吸引或較有特色嘅,我見隔離檯嘅小朋友叫咗香蕉船好似幾得意,於是就揀咗佢.船身係一整條開邊香蕉,中間夾著三球分別係曲奇味,朱古力味同芒果味嘅雪糕,上面就用士多啤梨點綴,再不規則咁灑上迷你棉花糖,迷你M&M朱古力豆,蜜糖星星餅,仲插咗兩條百力滋做帆.賣相令人重拾童心,都真係幾開心嘅.因為所有材料都唔洗額外烹調,將生果切好,再同其他嘢組合晌一齊就完成,只要唔係擺咗好耐唔新鮮嘅話就唔會難食。


朋友嘅石板街朱古力窩夫,係用鮮忌廉,迷你棉花糖,果仁同曲奇味雪糕伴碟.我食咗少少,窩夫同我之前晌第二度食到嘅有少少分別,呢度嘅質感唔脆唔腍同較鬆化,我覺得佢個質感有少少似布朗尼.但佢嘅朱古力味唔濃,感覺一般,不過朋友就話OK.

熱焦糖新地 ~ 麥當勞

之前買安格斯漢堡套餐時送咗張熱焦糖新地贈券,呢日就換咗嚟食.

原本係液態嘅熱焦糖遇上冰冷嘅牛奶雪糕後,即時凝成濃稠狀態,食起嚟有啲痴牙,但就幾香,估唔到甜度比朱古力醬低,冇甜到漏嘅感覺,配上花生碎一齊食都唔錯.

簡單晚餐 ~ 華園餃子館

同朋友去咗華園餃子館食嘢,去到時都冇乜人.酸辣湯麵,都幾足料.


小籠包,呢個拎嚟時係冇冒煙,冇新鮮熱辣嘅感覺.


咬咗一啖,外皮幾煙韌,可惜唔係熱辣辣,入面肉汁唔多同比較乾身.

瑞士芝味安格斯漢堡 ~ 麥當勞

買咗麥當勞期間限定嘅瑞士芝味安格斯漢堡.


麵包挺實而鬆軟,安格斯牛肉漢堡扒比一般嘅漢堡扒厚身非常多,同埋冇咁乾身.香蒜蛋黃醬略少,但配上白芝士同車打芝士都幾惹味.炒洋葱同生菜爽脆兼可中和膩感,只係烤蘑菇片份量唔多,同埋包身滲出唔少油份.

不過以麥當勞出品嚟講水準唔差,價錢亦可接受.

旺區小菜 ~ 富記

去開附近,見呢間富記有不少人,於是就揀咗佢.



我哋買咗叉燒,揚州炒飯同鹹蛋蒸肉餅,叉燒睇落幾靚,可惜口感稍為遜色.

揚州炒飯炒得粒粒分明,入面有蝦仁,蛋絲,生菜絲同蔥等等,算係每啖都有配料,唔會只有飯,調味亦唔錯.

鹹蛋蒸肉餅,肉餅剁得鬆化唔死實,肉汁頗多,配上鹹蛋食都幾惹味.

馬鞍山牛腩小店 ~ 永利清湯腩

原本想食另一間,不過因為滿咗就食附近嘅永利清湯腩.


當時係得一檯客,但坐低冇耐就陸續有食客嚟,之後仲要等位.


粉麵最貴只係四十蚊左右,仲包飲品一杯,冷熱同價,以呢邊嘅物價嚟講算合理.


凍奶茶奶味較重,冇乜茶味,而且味道稍甜.


清湯坑腩金錢肚飯,配飯嘅話清湯另上.金錢肚軟腍.坑腩極肥.好彩唔算膩.


清湯爽腩牛筋河粉,爽腩爽口,牛筋易嚼,清湯唔濃但味夠.


我哋加咗碟淨蘿蔔,煮得非常透同冇渣.


佢哋嘅辣椒油加咗炸蒜,對我嚟講辣度非常輕微,不過都幾香.

呢度嘅牛腩質素中等,唔算非常出色,而且數量頗少. 其實馬鞍山區內連鎖店林立，小店要賴以生存都唔係易事,而且香港舖租人工皆貴,加上牛腩一向成本較高,所以呢個價錢同呢個份量叫做可以接受.

友善嘅收銀姐姐 ~ 食得樂

去深水埗當然係食比較地道嘅餐廳, 最後就去咗北河街食得樂.



路過唔知幾多次,呢日先係第一次入去,午餐定價先$38左右,就有港式客飯,另包餐飲,餐湯或甜品(三揀一),價錢都幾大眾化.


紅燒獅子頭,獅子頭(肉丸)有三粒,仲有唔少伴菜如紹菜,胡蘿蔔,冬菇等等,蔬菜同肉嘅比例均衡.


咖哩豬扒,豬扒炸得外脆內鬆化,雖然食得出經鬆肉粉之類處理過,但味道上都算可接受.咖哩汁係港式偏黃嗰種,食起來辣度輕,反而係以鹹味為主,當中仲有香葉增加香味.配料方面就有薯仔,胡蘿蔔同洋蔥,以港式客飯嚟講一啲都唔頹.



另外加咗碟菜心苗,無渣之餘蠔油份量都唔少.


隨午餐仲有餐飲,熱奶茶茶味同奶味都一般,但唔洗四十蚊就有客飯同餐飲,都冇乜好挑剔.

港式客飯一般偏向多肉少菜,呢度就做到兩者平衡,調味方面亦冇太重鹹味嘅感覺,相對起來就較健康.

其實去呢類價錢唔貴嘅餐廳,都唔會期望有乜服務可言.不過佢哋嘅收銀姐姐就非常非常非常友善,仲主動同我哋解釋客飯除可配餐飲外,亦可揀餐湯或甜品.當日有唔少睇落似係附近返工或居住嘅人士嚟買外賣,佢哋猶豫揀邊款仲問意見時收銀姐姐都好樂意解答. 換著係第二間廉價餐廳,咁樣應該會換嚟黑面吧?