牛油果雞堡 ~ 麥當勞

食咗新嘅熱帶牛油果雞堡餐,哈,張麵包紙上嘅圖案又幾靚.

熱帶牛油果雞堡入而有牛油果粒,炸雞塊,車打芝士同科布沙律醬. 拎上手就只係微微哋暖,不過都幾挺身. 麵包表面有啲似足球,質感比平時嘅漢堡包較鬆軟,炸雞塊嘅味道同平時嘅麥香雞差唔多. 醬汁唔太出,不過牛油果粒份量比想像中多,同車打芝士一齊食,好似比平時嘅漢堡健康.

不過牛油果本身無乜味,加上質感較腍,稍稍大力一壓就成蓉,其實唔係所有人都會鍾意,感覺上女仔對佢嘅接受程度可能會比男仔大.

佐敦新式串燒 ~ 川燒

佐敦附近有幾間專食串燒嘅舖頭,比較出名嘅都食過,反而川燒就未食過.

 
呢杯青檸荔枝梳打飲落幾甜,夏天飲凍嘢係透心涼啲.

 
呢度啲款式都幾新式,今次就叫咗幾款串燒燒物嚟試吓.

燒特濃芝士五花腩,上面有香草芝士,五花腩肥脂部份爽脆,肉質唔癡牙,冇乜一口油嘅感覺, 唔錯.


黑松露腐皮溫泉玉子,腐皮燒到微微哋脆,中間有黑松露嘅獨特香味,同半流心溫泉玉子一齊食又唔會太膩.


燒蘇格蘭蟶子王,佢個size幾大,用咗蒜蓉,豆豉,蔥調味,啲肉好厚同鮮甜.

 
川味芝士撈麵,即係辣版嘅芝士撈公仔麵,入面有蔥,洋蔥等等.


公仔麵煮得較腍,醬汁仲搵到花椒粒蹤影,就係類似平時雞煲嘅麻辣味,比較啱啲鍾意重口味嘅人.

 
蜂蜜燒鳳梨,燒得好香同多汁,作為餐後甜品都唔錯.

一大班人會好啲 ~ 達人包車

 去咗銅鑼灣嘅達人包車食晚餐,裝修係近年流行嘅工業風,感覺幾好.

青色檸檬果汁飲料,雖然明知係色素,但黃色鮮檸檬片同藍色飲料,黃加藍變綠嘅外表又的確幾吸引人去試,味道酸酸哋,幾開胃.

1m超大串燒,叫嗰陣都有啲擔心我哋人少會應付唔到,不過呢個係佢哋嘅名物,第一次嚟就豁出去叫嚟試試.侍應晌我哋張枱側邊搭起支架再掛上串燒,即刻吸引唔少食客目光.目測下接近一米長嘅串燒上有豬腩肉,豬肋骨,雞扒,蝦,車打芝士腸,車厘茄,菠蘿,南瓜,三色椒,雞脾菇,洋蔥,大蔥.

啲食物已經預先燒到半熟,再由oppa將佢哋逐一由串燒上面拎落嚟,晌鐵板上加熱至全熟嚟食.

概念上幾好玩,影相一流,肉類同蔬菜本身就冇特別調味,所以可以點跟埋嘅泰式辣醬,麻油鹽,韓式麵豉醬，另外可以用生菜包住一齊食.

呢度嘅食物份量都唔少,好似適合一大班人食多啲,人太少嘅話就太豐富.

細細份 ~ 糖百府

同朋友食完飯就去食甜品,見唔洗點等就去咗呢度.

見menu介紹寫雪丸嘅法文名係Neige,佢寫係用生果之類嘅材料整,同埋係佢哋嘅新皇牌之一,咁就俾佢吸引咗.

桑莓雪丸,實物好似比menu啲圖扁同塌,但係用餅乾條,士多啤梨,忌廉同朱古力醬點綴,都叫做幾有心思嘅.

至於味道方面,桑莓雪糕就偏甜同比較人工化,同埋佢個份量都真係幾"法國菜",三四啖就食完喇.

支持明哥 ~ 北河燒臘飯店

去呢度唔多唔少係想支持明哥,佢哋一個盅頭飯加一款菜,堂食嘅話先廿蚊,外賣只係十八蚊,平得過份.

我哋分別買咗北菇滑雞盅頭飯配西蘭花 同 鳳爪排骨盅頭飯配椰菜,排骨同鳳爪都總算仲有肉味,冇醃過頭,飯就幾濕同腍,應該係因為附近比較多老人家,始終佢哋牙力唔好,煮腍啲就易食啲.我份椰菜都唔少,食落爽脆甜香,有啲菜個感覺都好似均衡啲,不過就多油咗少少.

平時晌網上唔同途徑睇到有關明哥嘅報導,當日見到佢真人坐鎮晌度,有啲小fans睇偶像嘅感覺,haha…