芝士夠多 ~ Yadllie Plate

朋友都幾鍾意食韓國嘢,呢晚佢就帶咗我去旺角間Yadllie Plate. 呢度裝修係木質材料為主,感覺幾舒服.


好多嘢都想試,可惜我哋得兩把口,好唔容易先揀咗幾款.


對佢哋嘅水果米酒幾有興趣,可惜當日尚未有供應,又唔想飲罐裝飲品,於是就試試佢哋呢款手製水果酒,芒果菠蘿燒酒,質感較稠,飲落甜香,酒味唔濃,攞嚟消暑都唔錯嘅.


芝士排骨,鐵板上放咗大量Mozzarella Cheese,再晌小火爐上加熱溶化,當中仲有啲紅黃椒絲.


由侍應為我哋處理,只見佢拉出強勁嘅芝士絲,就咁睇都覺得吸引.


豬肋骨預先燜煮至鬆化易嚼,外面醬汁微甜,芝士碎比例上較我食過嘅餐廳多至少一倍,平時食得唔夠喉,今次就可以食到飽,甚至纏多十幾圈都仲有剩.


最後仲試埋勁麵,即係冷麵配切絲青瓜,胡蘿蔔,車厘茄,雜菜同烚蛋,加埋韓式醬汁拌勻嚟食,麵條煙煙韌韌,味道酸酸辣辣,可以中和芝士排骨帶嚟嘅膩感.

又西又泰? ~ Griller Spot

只係想搵個冇乜人嘅地方坐坐食吓嘢,呢度lunch除咗有西式食物外,仲有冬陰公等等嘅菜式,選擇上都幾國際化,我覺得一間以西餐做定位嘅餐廳,卻有提供泰式食物,好似有少少格格不入咁.



個餐包飲品,我嗰杯係最基本嘅熱檸茶,穩穩陣陣.


茄子忌廉湯,餐只係包餐飲同主菜,湯或沙律就要加錢,都係第一次接觸呢種配搭,飲落有啲微酸,同埋有少少唔太討好嘅油膩感,對佢喜愛度一般.


芝士雞肉長通粉,配料有雞絲,西蘭花,紅洋蔥等,另加錢加埋蝦肉,賣相簡單,長通粉就煮得爽口彈牙,白汁忌廉亦算稠身同剛好沾滿長通粉表面,額外加錢嘅蝦有四隻,係一般雪藏貨,肉質唔霉,雞絲同西蘭花亦冇煮得太腍,算係幫個湯挽回少少印象分.

翻開餐牌時仲因為佢國際化又西又泰嘅選擇而擔心,都唔知我係叫啱嘢定點,呢次主菜嘅外觀同味道都算OK,但茄子忌廉湯就唔敢恭維,同埋蝦肉都唔見得好出眾,只係食份lunch本身有嘅嘢就OK.

中途站 ~ 星馬屋

 
去咗呢頭附近,只係想食少少嘢,就揀咗星馬屋.其實係間港式茶餐廳,睇一睇餐牌,價錢都幾平.樓底又夠高,仲有湖畔景緻,總算係比外面啲茶餐廳優勝.


炸雞髀沙律配熱奶茶,沙律入面有菠蘿,青瓜,胡蘿蔔,馬鈴薯,西芹,罐頭雜果,以一間港式茶餐廳嚟講材料豐富,滿滿嘅蔬菜較只係食肉類來得健康,同埋冇出水之類嘅情況.不過雞髀就炸得非常非常非常乾身,外皮仲脆到好似雞皮版豬肉紙,感覺一般,更莫說肉汁同肉質.咁其實以呢個價錢嚟講尚可接受,沙律亦將炸雞髀嘅缺點掩蓋咗.

 
熱奶茶茶味重,正正常常.

 
朋友嘅咖哩牛腩飯配凍檸茶,當日碟上就只有牛腩,又冇其他蔬菜伴碟,口感較單調,味道就算係可以.

咁如果晌呢頭返工或踩單車想中場休息,只係想搵個平平哋而又有啲美景嘅地方坐坐都未嘗不可嘅.

差異大 ~ 翠湖軒

求其食啲嘢,就揀咗經過N次但冇食過嘅翠湖軒,門外有幾個卡位,都幾有趣,應該係為咗方便駕車或吸煙人士吧. 呢度嘅下午茶只係三十幾蚊左右,都算平.

我揀咗鮮茄排骨濃湯螺絲粉配奶油脆豬炒蛋同熱奶茶,朋友就係麻脆雞扒酸辣米線同凍檸茶. 我嗰份餐睇落幾豐富,除有番茄同排骨外,仲有胡蘿蔔同馬鈴薯,有啲蔬菜感覺好似健康啲啲.排骨,蔬菜同螺絲粉煮得幾腍,湯底係羅宋湯,酸酸甜甜,夠味而冇咩好口渴嘅感覺.

烘到脆脆哋嘅豬仔包上面搽咗牛油同煉奶,炒蛋唔鞋,只係偏油咗啲.

朋友嗰份餐就一般般,米線麻辣度尚可.

不過塊炸雞扒表層炸漿比肉仲要多,乾爭爭咁,朋友笑笑口話好似只係拎塊皮去炸咁.  

餐飲方面大致正常,食物方面如以鮮茄排骨濃湯螺絲粉配奶油脆豬炒蛋嚟講係唔差同幾抵食，以麻脆雞扒酸辣米線嚟講就感覺唔太良好,揀唔同嘅嘢出嚟嘅差異都幾大.

牛肉丸 ~ 群記

想買群記出品嘅豬手,可惜啱啱好賣晒,於是買咗碗牛肉丸,呢度係區內老店之一,人氣幾勁,當日店外就擠滿等候入座嘅人潮,不過外賣就唔洗等.

牛肉丸爽口彈牙有肉香,食得出唔係用麵粉之類填充物充數,湯底濃郁但冇重味精感.

如果咁啱去開呢頭嘅話,買嚟食吓都可以,不過又未至於值得花時間去排隊.