舊式西餐 ~ 哥登堡餐廳

同朋友去咗哥登堡餐廳食舊式西餐,呢度嘅裝修都真係幾懷舊.


我哋叫咗兩份晚餐,都係包餐湯,飲品同甜品.


呢份係自選晚餐,我揀咗黑椒汁豬扒牛扒配薯菜,兩份扒嘅肉質都算鬆化唔韌,不過就似係預先整好,拎到嚟時只係暖暖哋,唔係好夠熱.


自選晚餐係包埋法式田螺嘅,呢個就好熱辣辣,不過又唔會焗到好乾身,田螺下面仲有薯蓉晌度,感覺上呢個比份扒仲出色.


另一份就係鐵板餐,揀咗黑椒汁雜扒配薯菜,有牛扒,豬扒,雞翼,腸仔同煙肉,食鐵板餐最開心係倒啲汁落去嗰下,同埋食到最尾都keep到仲係熱嘅.

呢度嘅食物唔算好特別,勝在價錢唔貴,想食下鐵板餐嘅話都唔錯嘅.

應該冇乜香港人未食過 ~ 澳洲牛奶公司

應該冇乜香港人未食過澳牛,前幾年我去開附近一諗唔到食乜都會去食,不過近年就少咗好多.

嚟呢度都係食火腿通,火腿絲份量同我之前嚟嗰陣冇大分別,味道鹹鹹哋咁,通粉亦冇煮到好腍,簡簡單單已經好惹味.


炒蛋多士,炒蛋仍然滑溜,搽咗牛油嘅厚身白麵包烘到有少少燶燶哋,食落香口.



最後就快快手飲埋杯熱奶茶就走喇.

呢次再去,門口仍然有好長嘅人龍,座位仍然都係背對背咁坐,啲侍應哥哥仍然都係咁快手快腳,唯一唔同嘅係,前幾年好有霸氣嘅侍應哥哥好似收歛咗,以前係你叫嘢食嗰陣諗多一秒都會催你,而家就溫柔咗好多,嗰日仲見到佢哋會同啲旅客傾下偈呢.

佐敦平價糖水 ~ 明記甜品

去開佐敦食晚餐嘅話,有陣時都會去吳松街呢間明記甜品食下中式糖水,雖然環境非常非常非常地踎,不過佢一碗糖水都係十幾蚊左右,價錢真係唔貴.


呢次我就叫咗馬來亞喳咋,佢入面有好多芋頭,紅豆,眉豆,紅腰豆,三角豆等等,非常足料,佢哋仲將啲雜豆煮到有少少起沙,令到成個糖水嘅質感都好濃同好稠,食起嚟個味道就唔會太甜,椰汁味亦都幾突出,以十幾蚊一碗嘅中式糖水嚟講性價比都真係幾高,我食完呢一碗之後已經覺得有少少飽喇.

羊肉湯米 ~ 雲南阿老表黑羊湯鍋米綫

呢度啲粉麵係有分大同細,朋友就叫咗碗大嘅帶皮羊肉米粉,拎到嚟都真係好大碗.


我就叫咗細碗嘅淨瘦羊肉米粉,同埋加咗酸菜,拎到嚟嗰陣又嚇咗一嚇,乜原來細碗都咁大碗嘅?目測之下容器同大碗分別唔大,只係矮身少少.

呢度話係用黑山羊肉,佢俾嘅份量都唔少,同埋用咗最基本,冇咩調味嘅方法去煮,食落羶味突出,但都可以接受.另外佢個湯飲落好似冇乜味,主要係靠我額外加嘅酸菜提味.


我哋仲叫咗口水雞,唔算好辣,不過啲雞肉都幾滑.

可能係我本身對羊肉嘅愛好唔係太強,同埋佢哋係食羊嘅原味,所以對我嚟講感覺唔算好吸引,不過講份量嘅話又真係算對得住個價錢.

N1出口咖啡店 ~ N1 Coffee

呢一次我自己一個去咗位於尖沙咀N1地鐵站出口附近嘅N1 Coffee坐一坐,飲下咖啡,抖一抖.

我叫咗Latte,杯咖啡個拉花都幾靚,同埋奶泡都打得幾滑,仲keep到幾耐下,就算飲完都冇乜變樣. 味道方面,有啲咖啡店嘅Latte奶味係非常非常非常重嘅,而呢度就仍然可以飲到一陣陣烘過嘅咖啡豆焦香,同埋少少甘甘澀澀嘅味道,對我嚟講感覺都幾啱胃口.

呢度嘅裝修都睇得出花咗唔少心思,同埋係用綠色做主色,望落都幾舒服唔突兀,唯一唔好嘅係個舖位比較細,啲座位擺得比較密同有少少迫迫哋,所以我呢次都係快快飲完就走喇.

甜一甜 ~ Paul Lafayet

去咗Paul Lafayet買甜品嚟食,揀咗Oolong味嘅馬卡龍,即係烏龍茶味嚟. 灰黑色嘅造型,單睇外表嘅話應該會以為係芝麻味,中間夾心部份就係泥黃色.佢同一般馬卡龍一樣都係偏甜,同埋唔太食到有烏龍茶嘅味道,不過佢嘅質感就幾鬆脆同帶少少煙韌,唔會一咬即散.

另外仲有Blueberry Cheesecake,面層用鮮藍莓同單邊馬卡龍點綴.底層嘅芝士蛋糕用咗比較輕盈嘅忌廉芝士,內層同底層就分別有藍莓醬同牛油餅底,口感就係杯裝版嘅紐約芝士蛋糕咁,酸甜有致又唔會太膩.